Батыс Қазақстан облысында 233 оқушы мектепті «Алтын белгімен» бітірмек, деп хабарлайды Todayinfo ақпараттық агенттігінің тілшісі.
Облыстағы 376 мектепте 122 мыңнан астам оқушы білім алса, биыл соның 10 450-ы 9-сыныпты бітіріп, 6 411-і алтын ұядан түлеп ұшады.
БҚО білім басқармасының басшысы Айгүл Мыңбаеваның сөзінше, 233 оқушы «Алтын белгіден», 328 түлек «Үздік аттестаттан» үміткер. Білім басқармасы басшысының сөзіне қарағанда, , мектеп бітірушілер үшін оқу жылының аяқталуына арналған «Мектебім, саған мың алғыс!» іс-шарасы 25 мамыр күні өтеді.
«Мектептердің барлық 9, 11-сынып түлектері қорытынды және мемлекеттік аттестаттаудан өтеді. 9-сынып бітірушілері үшін қорытынды емтихандар 29 мамыр мен 10 маусым, ал 11-сынып бітірушілері үшін мемлекеттік емтихандар 28 мамыр мен 11 маусым аралығында болады. 9-сыныптарда 4 пәннен емтихан тапсырады: оқыту тілі (қазақ/орыс тілі), математика (алгебра), қазақ тілі мен әдебиеті/орыс тілі мен әдебиеті,таңдау пәні. 11-сыныптарда 5 пәннен емтихан тапсырады:оқыту тілі (қазақ/орыс/ тілі), алгебра және анализ бастамалары, Қазақстан тарихы, қазақ тілі мен әдебиеті/орыс тілі мен әдебиеті,таңдау пәні. Биыл алғаш рет 5-8, 10-сынып оқушылары үшін «Қазақ тілі», «Қазақ тілі мен әдебиеті» пәнінен емтихан өткізіледі», — деді БҚО Білім басқармасының басшысы Айгүл Мыңбаева.
Басқарма басшысының айтуынша, түлектерге аттестаттарды табыстау рәсімі «Жолың болсын, жас түлек!» тақырыбында 14 маусым күні өтеді.
«Ұлттық бірыңғай тестілеуге қатысу үшін оқушылар 6-20 мамыр аралығында тіркелді. ҰБТ 25 мамыр — 12 шілде аралығында өтеді. 6 411 мектеп бітірушінің 5 627-сі Ұлттық бірыңғай тестілеуге қатысуға ниет білдіріп отыр. Батыс Қазақстан облысы бойынша Ұлттық бірыңғай тестілеу «U Study» орталығының 2 пунктінде (Орал қаласы, А.Құсайынов көшесі 131/1а және Ақсай қаласы, Жастар көшесі, 29 ) өтеді»,- деді Айгүл Мыңбаева.
