2025 жылғы 17 шілде күні сағат 15:00 шамасында Батыс Қазақстан облысындағы Орал – Озинки автожолының 64-шақырымында, Усихино ауылының маңында ауыр жол-көлік оқиғасы тіркелді. Бұл туралы БҚО Полиция департаментінің баспасөз қызметі хабарлады,деп хабарлайды Todayinfo ақпараттық агенттігі.
Алдын ала мәлімет бойынша, Chevrolet Aveo көлігінің жүргізушісі оңтүстік бағытқа қарай келе жатып, КамАЗ жүк көлігін басып озуға әрекеттенгенде рөлге ие бола алмай, жүк көлігінің артқы бөлігіне соғылған. Қатты соққыдан кейін жеңіл көлік өртке оранып, жүргізуші мен үш жолаушы оқиға орнында мерт болды.
Аталған факті бойынша ҚР Қылмыстық кодексінің 345-бабы 4-бөлігі (Жол қозғалысы ережелерін бұзу, абайсызда екі немесе одан да көп адамның өліміне әкеп соғу) бойынша іс қозғалды. Қазіргі таңда алдын ала тергеу амалдары жүргізіліп, тиісті сараптамалар тағайындалған.
Батыс Қазақстан облысының Полиция департаменті барлық жүргізушілер мен жол қозғалысына қатысушыларды жол жүру ережелерін қатаң сақтауға үндейді.
«Кез келген ережебұзушылық қайғылы жағдайға әкелуі мүмкін. Жүргізушілерді рульде аса мұқият әрі жауапты болуға шақырамыз», – делінген ресми хабарламада.