Тараз қаласындағы №54 мектептің 10-сынып оқушысы Қыдырәлі Қыздарбек өрт кезінде ерлік танытты, деп Halyqstan телеграм арнасына сілтеме жасай Todayinfo хабарлайды.
Куәгерлердің айтуынша, 15-шағынаудандағы көпқабатты үйдің бесінші қабатынан шыққан өрт кезде ол екі кішкентай баланы аман алып шыққан.
Оқиға орнында болған тұрғындар мектептен қайтып келе жатқан оқушының терезеден шыққан қою түтінді көріп, бірден көмекке ұмтылғанын айтты.
«Адамдар көшеге қашып шығып жатты. Ал Қыдырәлі еш ойланбастан үйдің кіреберісіне қарай жүгірді. Пәтерде өрт болып жатқан кезде ішінде екі бала болған. Бірі бесікте жатқан, екіншісі ойнап жүрген. Ол балаларды көтеріп алып шығып, жылап тұрған анасына тапсырды. Кейін пәтерде тағы біреу қалып қоймады ма деп, өрт сөндірушілер келгенше қайта кіріп шықты», – дейді тұрғындар.
Өрт сөндірушілер келгеннен кейін Қыдырәлі үйіне қайтқан.
Фото:скрин
