Жастардың білімге деген құлшынысы мен табандылығы – еліміздің жарқын болашағының кепілі. Мұны Алматы облысындағы №39 гимназияның 11-сынып оқушысы Сақийдулла Алматтың зор жетістігі тағы бір дәлелдеп отыр, деп хабарлайды Todayinfo ақпараттық агенттігі.
Ол АҚШ-тың жеті беделді университетінен шақырту алып, алтауы ұсынған ірі көлемдегі гранттарға ие болды. Жалпы сомасы – шамамен 320 миллион теңге. Сонымен қатар, Малайзиядағы Xiamen University Malaysia оқу ордасы да оны толық грантпен қабылдаған.
Болашақ студент білімге деген ынтасы мен қажырлы еңбегінің арқасында University of Miami, Elmhurst, Caldwell, Augustana, UNO, FIU және басқа да оқу орындарынан оқуға ұсыныс алды.
IELTS нәтижесі – 7.0, ал SAT – 1420 балл (оның ішінде математикадан – 780/800). Қазіргі таңда ол Назарбаев Университетінен де ресми жауап күтуде.
Сақийдулла Алмат – «Алтын белгі» үміткері. Оның бұл жетістігі – жастардың білімге ұмтылса, кез келген биікті бағындыра алатынын көрсететін жарқын мысал. Бұл – тек бір оқушының жеңісі емес, еліміздің болашағына деген сенімнің дәлелі. Осындай жастар – Қазақстанның дамуына үлес қосатын басты қозғаушы күш.
