Microsoft компаниясының негізін қалаушы АҚШ-тың халықаралық көмегін қысқартуды қатты сынға алды, оның айтуынша, бұл қысқартудың артында Маск тұр. Гейтс кедейлік пен ауруларға қарсы күреске өзінің бүкіл байлығын дерлік жұмсауға уәде берді.
Билл Гейтс 2045 жылға дейін өзінің қайырымдылық қоры арқылы 200 миллиард доллар бөлу жоспарын мәлімдеді, бұл арқылы миллиондаған балалардың өмірін құтқарып, ауыр ауруларды жоюды көздейді. Financial Times және Reuters басылымдарына берген сұхбатында ол Илон Маскты жаһандық гуманитарлық бағдарламаларды әлсіреткені үшін айыптап, алдағы жылдары өлім-жітім артуы мүмкін екенін ескертті.
Гейтстің айтуынша, Маск 2023 жылы халықаралық көмекке 44 млрд доллар бөлген USAID (АҚШ халықаралық даму агенттігі) бағдарламаларының шамамен 80% қысқаруына негізгі рөл атқарған. Маск бұған дейін «USAID-ті құрбандыққа шалдым» деп мәлімдеген еді.
«Ең бай адам ең кедей балаларды өлтіріп жатқан сурет жағымды емес», — деді Гейтс Financial Times-қа.
Илон Маск бұл айыптауларды «жалған» деп атады.
Билл Гейтс қоры 2045 жылғы 31 желтоқсанда жұмысын жоспарлы түрде тоқтататынын, соған дейін 69 жастағы миллиардердің байлығының басым бөлігін жұмсайтынын айтты. Қаражат полиомиелитке, безгекке және жаһандық кедейлікке қарсы күреске бағытталады.
Гейтс қорының жылдық бюджеті 10 млрд долларға дейін өседі, бірақ миллиардердің айтуынша, мемлекеттердің қатысуынсыз жаһандық мәселелерді шешу мүмкін емес. «Келесі 20 жылда үкіметтер балалардың аман қалуына қайта көңіл бөлуі тиіс деп санаймын», — деді ол.
2000 жылы Билл мен Мелинда Гейтстер құрған қор бүгінге дейін қайырымдылыққа 100 млрд доллар бөлген.
Гейтстің айтуынша, көмектің қысқаруы алдағы жылдары миллиондаған адамның өліміне әкелуі мүмкін. Сондай-ақ, ол АҚШ-тың қолдауынсыз полиомиелитті жеңу мүмкін еместігін айтты, дегенмен кейбір африкалық елдер бұл ауруға қарсы күреске қосымша қаржы таба алған.
