Сайрам ауданында тарихи әрі маңызды шара – аудандық Қазақстан халқы Ассамблеясының І сессиясы өтті. Бұл басқосу өңірдегі этносаралық татулық пен қоғамдық келісімді нығайтуға бағытталған алғашқы ауқымды жиындардың бірі болып саналады, деп хабарлайды Todayinfo ақпараттық агенттігі.
Сессияға аудандық ҚХА төрағасы, аудан әкімінің міндетін уақытша атқарушы Сержан Дүйсебаев төрағалық етті. Сонымен қатар жиынға облыстық қоғамдық даму басқармасы басшысының орынбасары, Ассамблея хатшылығының меңгерушісі Нұрсұлтан Сейтжанов, аудандық Ассамблея мүшелері, үкіметтік емес ұйым өкілдері, ауылдық округ әкімдері, бөлім басшылары, аудандық мәслихат депутаттары, зиялы қауым және жергілікті БАҚ өкілдері қатысты.
Жиын барысында сөз алған Нұрсұлтан Сейтжанов Ассамблеяның қоғамдағы ерекше орнына тоқталып, оның еліміздегі бейбітшілік пен бірлікті сақтаудағы рөлін атап өтті:
«Ассамблея – еліміздегі тұрақтылықтың, татулықтың, келісімнің негізгі тірегі. Мұнда әрбір этностың мәдениеті мен дәстүрі ұлықталып, барша халық ортақ құндылықтар төңірегінде бірігеді. Мемлекет басшысының тапсырмасына сәйкес, Қазақстан халқы Ассамблеясы этносаралық келісімді нығайту ісінде ерекше жауапкершілікке ие. Бүгін Сайрам ауданында өткен алғашқы сессия – осы бағыттағы нақты қадамдардың бірі. Ассамблея болашақ ұрпаққа бейбітшілік пен достықтың өнегесін ұсынатын бірегей институт болып қала бермек. Баршаңызға алдағы қызметте сәттілік тілеймін» – деді ол.
Күн тәртібінде бірқатар өзекті мәселелер қаралды. Атап айтқанда, аудандық ҚХА-ның құрамы бекітіліп, алдағы кезеңге арналған жұмыс жоспары таныстырылды. Сонымен бірге этносаралық қатынастарды дамыту, халықтар арасындағы өзара сыйластықты арттыру бағытында атқарылып жатқан шаралар мен оларды жетілдіру жолдары сөз болды. Қатысушылар қоғамда туындайтын кейбір өзекті мәселелердің алдын алу тәсілдерін талқылап, ұсыныстарын ортаға салды.
Сессия барысында Ассамблея мүшелері мен этномәдени бірлестіктердің төрағалары да сөз алып, аудандық ҚХА тарапынан іске асырылатын бастамаларды қолдайтындықтарын жеткізді. Олар бірлескен жобаларды жүзеге асыру арқылы өңірдегі қоғамдық келісімнің одан әрі нығая түсетініне сенім білдірді.
Жиын соңында қатысушылар пікір алмасып, келесі сессияда қаралатын мәселелерді алдын ала айқындап алды. Осылайша, Сайрамдағы Қазақстан халқы Ассамблеясының І сессиясы ынтымақ пен бірлікті дәріптеген мазмұнды басқосу болды.
