Абай облысының әкімі Берік Уәли өңір халқын Қазақстан халқының бірлігі күнімен құттықтады, деп хабарлайды Todayinfo ақпараттық агенттігі.
«Бірлік пен татулық – өткеннен жеткен аманат, асыл мұра. «Бірлік бар жерде – тірлік бар» деген дана халқымыздың сөзі елдігіміздің темірқазығы болып келеді. Мемлекет басшысы Қазақстан халқы Ассамблеясының 34- сессиясында сөйлеген сөзінде: «Бейбітшілік пен тұрақтылық – тағдырдың бізге бере салған сыйы емес. Бұл – бір ел, бір халық болып атқарып жатқан қажырлы еңбектің жемісі» деген болатын. Хакім Абайдың «Адамзаттың бәрін сүй бауырым деп» деген ізгі ұстанымын бойтұмар қылған абайлықтар бір қолдың саласындай, бір үйдің баласындай тату өмір сүріп келеді»,-деді әкім.
Берік Уәли бүгінгі таңда облыста 5 Достық үйі мен 46 этномәдени бірлестік жұмыс істейтінін атап өтті.
Әкімнің айтуынша, өңірде жалпыұлттық бірлікті нығайту мақсатында жалпы саны 400-ге жуық іс-шара өткізілді.
«Осының барлығы белсенді азаматтық ұстаным мен ұлт тұтастығын көксеген сіздердің еңбектеріңіз, ардақты ағайын! Енді, алдымызда еліміздің татулығын төрге оздырған Қазақстан халқы Ассамблеясының 30 жылдығы мен Абай Құнанбайұлының 180 жылдық мерейтойын лайықты деңгейде атап өту міндеті тұр. Мемлекет басшысының қолдауымен барлық өңірлер қатысатын «Абайға құрмет» республикалық акциясы аясында Маңғыстау облысы қаламызға Достық үйін салғалы жатқанын жеткізгім келеді»,- деді Берік Уәли.
