Бишімбаетың сотын жүргізіп жатқан судья Айжан Құлбаеваға белгісіз біреулер қоқан-лоқы көрсеткен, деп хабарлайды Todayinfo агенттігі.
Жоғарғы Соттың хабарлауынша, судьяға белгісіз біреулер қоңырау соғып, хабарламалар жіберген. Төрткүл дүние түгел көз тіккен сот ісін жүргізіп жатқан судьяның өміріне қауіп төндірген белгісіз жандарға қатысты қылмыстық іс қозғалды.
«Бишімбаев пен Байжановтың ісі бойынша келесіні хабарлайды: Астана қаласының Полиция департаменті судья А. Көлбаеваға қатысты қорқыту фактісі бойынша қылмыстық іс қозғады. Судьяның ұялы телефонына белгісіз нөмірден қоңыраулар мен қорқыту хабарламалары түскен. Қылмыстық кодекстің 407-бабының 1-бөлігі (Сот төрелiгiн жүзеге асыруға кедергi жасау мақсатында соттың қызметiне араласу) бойынша сотқа дейінгі Іс жүргізу басталды», -делінген Жоғары соттың ресми мәлімдемесінде.
Судья жеке қауіпсіздік шараларымен қамтамасыз етілді. Сонымен қатар, интернет кеңістігінде жүргізілген мониторинг барысында судьяға қатысты қылмыстық құқық бұзушылық іс-әрекеттері бар көптеген жағымсыз жарияланымдар анықталды. Тексеру іс-шараларының нәтижелері бойынша тергеу органы Қылмыстық кодекстің 411-бабының 1-бөлігі (Судьяға жала жабу) бойынша қылмыстық іс қозғады.
«Заң кез келген адамға сот төрелігін жүзеге асыру процесіне, оның ішінде судьяның атына жала жабу немесе қорқыту сипатындағы материалдарды жариялау жолымен, ықпал етуге тыйым салатынын ескертеміз. Сот билігінің беделін түсіретін әрекеттердің жолы кесіледі», — делінген Жоғарғы соттың хабарламасында.
