Түркістан облысы әкімінің орынбасары Нұрбол Тұрашбеков мақта саласының өзекті мәселелерін қарастыру үшін аудан әкімдері, диқандар, мақта өңдеу зауыттарының басшылары мен өкілдері, сондай-ақ құқық қорғау органдарының қызметкерлерін қатыстырумен мәжіліс өткізді, деп хабарлайды Todayinfo ақпараттық агенттігі.
Жетісай ауданы әкімінің мәлімдеуінше, биыл 116,2 мың тонна мақта жиналуы күтілуде. Күзгі науқанға 715 трактор, 897 тіркеме, 61 дәрілегіш ОВХ агрегаты және 222 комбайн дайындалған. Аудан аумағында 7 мақта өңдеу зауыты мен 77 мақта қабылдау бекеті қызмет атқарады.
Шардара ауданы әкімінің орынбасары Жұмасұлтан Бердешов ауданда 16 814 гектар алқаптан 42 мың тоннадан астам өнім жинау жоспарланғанын хабарлады. Қазіргі таңда мақта қабылдау бекеттерінің дайындығы пысықталуда.
Мақтаарал ауданында егілген мақта алқабы 35,1 мың гектарды құрап, гектарына 27,1 центнер өнім жиналуы болжануда.
Мәжіліс барысында шаруалар өзекті мәселелерін ортаға салып, ұсыныстарын жеткізді. Мақта өңдеу зауыттарының өкілдері де биылғы жұмыс жоспарларын таныстырды.
Нұрбол Тұрашбеков аудан әкімдіктеріне шитті мақтаны сатып алу немесе терең өңдеу үшін инвестор тартудың маңыздылығын ескертті. Сонымен қатар, зауыттардың мүмкіндіктерін зерделеу және мақта қабылдау қуаттылықтарының болжамын ұсыну тапсырылды.
«Шаруалардың құқығын қорғау үшін бірыңғай сату-сатып алу келісім-шарт үлгісін енгізу қажет. Келісім-шартта қаржы төлеу мерзімі нақты көрсетілуі тиіс. Ортақ жұмысты күш қылмай, ақылға сай жүргізейік», – деді облыс әкімінің орынбасары.
Мақта науқаны барысында туындайтын мәселелерді жүйелі шешу үшін арнайы құрылған жұмысшы топ зауыттар мен қабылдау бекеттерінің жұмысын тұрақты түрде бақылап отырады.
