2025 жылдың басынан бері Түркістан облысы аумағындағы қоқыс полигондарында 13 жану дерегі тіркелді. Қазіргі таңда бұл бағытта өрт қауіпсіздігі талаптарын сақтау және бұзушылықтардың алдын алу бойынша нақты шаралар қабылдануда. Бұл туралы облыстық төтенше жағдайлар департаменті мәлім етті, деп хабарлайды Todayinfo ақпараттық агенттігі.
Анықталған заңбұзушылықтар бойынша жауапты тұлғалар әкімшілік жауапкершілікке тартылып, жалпы көлемі 5 млн 111 мың 600 теңге мөлшерінде айыппұл салынды. Мамандардың айтуынша, қоқыс алаңдарындағы өрт жағдайлары тек материалдық шығынға ғана емес, сонымен қатар қоршаған ортаға айтарлықтай экологиялық залал келтіруі мүмкін.
Осыған байланысты, күннің күрт ысуы мен құрғақ ауа райын ескере отырып, облыс аумағындағы барлық қоқыс полигондарын өрт қауіпсіздігі талаптарына сәйкестендіру бағытында жаппай профилактикалық іс-шаралар қолға алынған. Бұл жұмыстарға аудан, қала әкімдіктері мен уәкілетті органдар жұмылдырылған.
Өрттің алдын алу шаралары аясында полигондарды шектеу, сумен қамту мүмкіндіктерін қарастыру, арнайы техникамен жабдықтау жұмыстары жүргізілуде. Сонымен қатар, қоқыс алаңдарында жұмыс істейтін қызметкерлерге өртке қарсы нұсқама беру ісі де жолға қойылған. Түсіндіру жұмыстары тұрақты жүргізіліп, жауапты мекемелерге нақты талаптар қойылып отыр.
Мамандар өрт қауіпсіздігіне бей-жай қарамауға шақырып, төтенше жағдайлар туындаған жағдайда шұғыл түрде «101» және «112» нөмірлеріне хабарласу қажеттігін ескертеді. Облыс аумағындағы қоқыс полигондарының техникалық және қауіпсіздік жағдайы алдағы уақытта да тұрақты бақылауда болмақ.
