Әлеуметтік желіде Жамбыл облысында мал бағып, құлдықта өмір сүріп жатқан балалардың видеосы тарап, қоғамда үлкен резонанс тудырды, деп хабарлайды todayinfo.kz
Видеода екі бала бес жылдан бері ауыр жағдайда өмір сүріп келе жатқанын айтып, жұрттан көмек сұрайды.
«Телефонымызды тартып алды. Мал бағуға мәжбүрміз. Жолдан өткен көліктерден сағат сұрап, уақытты білеміз. Денемнің бәрі жара. Туған әкеме жетсем деп армандаймын. Анам сөйлескісі келеді, бірақ қорқып жүр», – дейді олардың бірі.
Кадрларда балалардың денесінде көгерген іздер мен жаралар бары анық көрінеді.
«Бізге көмектесіңіздерші, өтініш, алып кетіңіздер. Қой бақтырады, азайса, біз кінәліміз. Сол үшін таяқ жейміз», – деп жалынады бала.
Алдын ала мәліметтерге қарағанда, оқиға Талас ауданына қарасты Қаратау қаласының маңында болған.
Бала құқықтары жөніндегі уәкіл Динара Закиева балалардың қайда екені анықталғанын хабарлады.
«Бұл факті бойынша қылмыстық іс қозғалды. Қазір аймақтағы уәкіл Даурен Бақжанов жағдайды нақтылау үшін балаларға жол тартты», – деді омбудсмен.
