Танымал блогер Daricorn (шын есімі — Дариға Нұркеева) тағы да даулы жағдайға ілікті. Бұл жолы блогер жол қозғалысы ережелерін өрескел бұзғаны үшін әкімшілік жауапкершілікке тартылды. Бұл туралы Алматы қалалық полиция департаментінің баспасөз қызметі хабарлады,деп хабарлайды Todayinfo ақпараттық агенттігі.
Полицияның мәліметінше, әлеуметтік желілерді бақылау барысында Daricorn-ның автокөлікпен апаттық жағдай туғызған сәті бейнежазба арқылы тіркелген. Бейнежазбада блогер сигнал бермей, кенет жолақ ауыстырып, басқа көлік құралдарының қозғалысына қауіп төндірген.
«Тергеу қорытындысы бойынша құқық бұзушы ҚР ӘҚбК-нің 595-бабының 1-бөлігі (сигнал беру талаптарын орындамау) және 606-бабының 1-бөлігі (апаттық жағдай туғызу) бойынша әкімшілік жауапкершілікке тартылды», – делінген ресми хабарламада.
Полиция департаменті блогердің әрекетін интернеттегі танымалдылық үшін жасалған жауапсыз қадам деп бағалап, жолда мұндай әрекеттерге жол берілмейтінін атап өтті.
«Танымалдылық деңгейі немесе жазылушылар саны ешкімді жауапкершіліктен босатпайды. Заң – бәріне бірдей. Хайп үшін жасалған әрекеттер қатаң құқықтық бағаға ие болады. Әрбір заңбұзушылыққа лайықты жауап беріледі», – деді Алматы қалалық полиция департаменті.
Сонымен қатар, ведомство азаматтарды жолда жауапкершілік пен тәртіпті сақтауға шақырды. Қауіпсіздік – ойын емес, ол әр адамның өміріне тікелей әсер ететін маңызды фактор екені айтылды.
