Қазақстандық қаржы нарығының ірі ойыншысы Freedom Holding Corp халықаралық аренадағы ықпалын кеңейтуді жалғастыруда. Компания Түркия нарығына кіру үшін жергілікті банкті сатып алу бойынша келіссөз жүргізіп жатқанын ресми түрде растады.
Бұл жаңалық отандық финтех секторы үшін маңызды оқиғаға айналып отыр.
Bloomberg қандай дерек ұсынды?
Беделді Bloomberg басылымының мәліметінше, қазақстандық холдинг нақты TurkishBank AS қаржы ұйымын сатып алуды көздеп отыр.
Бұл келісім сәтті жүзеге асқан жағдайда, Freedom Holding өзінің экожүйесін Түркия секілді үлкен нарықта дамытуға мүмкіндік алады. Алайда, әзірге келіссөздердің нақты қай сатыда екені және келісім сомасы жарияланған жоқ.
Компанияның ресми ұстанымы қандай?
Банктің баспасөз қызметі НАРЫҚ редакциясына берген жауабында түрік банкін сатып алу процесі жүріп жатқанын жоққа шығармады. Дегенмен, компания өкілдері құпиялылықты сақтай отырып, нақты банк атауын атаудан бас тартты.
«Қазіргі уақытта біз шынымен де келіссөздер жүргізіп жатырмыз. Холдингтің Түркия нарығында дамуға, соның ішінде цифрлық банкімізді кеңейтуге қызығушылығы зор. Бірақ қарастырылып жатқан банктер мен келіссөздердің егжей-тегжейін ашуға әлі ерте», – деп мәлімдеді Freedom Holding Corp.
Бұған дейін холдинг басшысы Тимур Турлов компанияның географиялық ауқымын кеңейту стратегиясы туралы бірнеше рет айтқан болатын. Түркия нарығына шығу – осы стратегияның заңды жалғасы іспетті.
