Фото: видео скриншот
Қоғам қайраткері, журналист Санжар Керімбай әлеуметтік желідегі парақшасында қазақы тәрбие туралы сөз етті, деп хабарлайды Todayinfo.kz ақпарат агенттігі.
”Қазақы тәрбие енді трендке айналады. ХХІ ғасыр — ҚУЫСКЕУДЕ ғасыры. Ең қауіпті дәуірдеміз. Бұл кезеңде ұрпағыңды бұрынғыдай орысша мінез бен батыстық менталитетке баулумен ұшпаққа шыға алмайсың. Кім баласының жүрегіне ізгіліктің ұрығын сеуіп, баласын топырақ сипат мінезбен өсірсе сол ғана апаттан аман қалады. 13 жасқа толғанша балаңды тек қана қазақша өсір. Бөтен тілді үйретпей қоя тұр. 14 жастан әрмен қарай оқыса да ештеңеден құр қалмайды. Есесіне болмысының іргетасын қазақы тәрбиемен бекітіп алған балалар өте ұзаққа шабады. Өмірден алатын үлесін асықпай, аптықпай, тапырақтамай, жанықпай, ентікпей қалыпты табиғи ырғақпен игеріп кете береді. Міне Димаш та қазақша тәрбиенің рақатын көріп, әлемді аузына қаратып, талантын ұлт мүддесіне жаратып, әке-шешесін де жерге қаратпай, топырақ сипатта өркендеп кетіп бара жатыр. Осы алтын үлгімен кете беру керек. ХХІ ғасырда жаныңа осы ғана дауа”, — деп жазды Санжар Керімбай.
