Алматы қаласы Бостандық ауданындағы №65 мектеп-гимназиясында Республика күніне орай салтанатты іс-шара өтті, деп хабарлайды Todayinfo ақпараттық агенттігі.
Мерекелік шара егемен еліміздің тарихын дәріптеуге, жас ұрпақ бойында отансүйгіштік пен азаматтық жауапкершілікті қалыптастыруға бағытталды.
Іс-шараға Қазақстан Республикасы Ұлттық ұланының Бауыржан Момышұлы атындағы 5571 әскери бөлімінің қызметкерлері арнайы шақырылды. Олар оқушылармен кездесіп, патриоттық тәрбие бағытында тағылымды әңгіме өрбітті.
Салтанатты жиында әскери оркестр өнер көрсетті. Дирижёр — кәсіби музыкант Никита Беляков. Оркестр орындаған патриоттық әуендер мен әскери марштар көрермендерге ерекше әсер қалдырды.
Сонымен қатар, 11 «А» сынып оқушылары арасында әскери дайындық элементтерінен жарыс ұйымдастырылды. Автомат бөлшектеу және жинақтау сайысында Жекенова Алима мен Шарипова Наргиз жоғары нәтижелер көрсетті.
Мектептің алғашқы әскери дайындық пәні мұғалімі Айдын Ахметов іс-шараға қатысты өз пікірін білдірді:
«Мұндай іс-шаралар жас ұрпақтың бойында Отанға деген сүйіспеншілік пен елжандылық қасиеттерін қалыптастыруда маңызды рөл атқарады. Республика күні – еліміздің тәуелсіздік жолындағы тарихи таңдауын еске салып, болашаққа деген сенімді нығайтатын маңызды мереке.» — деді Айдын Ахметов.
