Қызылордада балалар мен жасөспірімдерге арналған шығармашылық-инновациялық академиясы ашылды, деп хабарлайды Todayinfo ақпараттық агенттігінің тілшісі.
Цифрлық технологиялар дамыған сайын балалар өмірінде виртуалды кеңістік шынайы өмірді алмастырып барады. Ойын арқылы дамиды деген түсінік – бүгінде елеулі қауіпке айналды. Себебі ойын – баланың қиялын байытумен қатар, шектен шыққан жағдайда оның болашағын бұлыңғыр ететін күшке айналуы мүмкін. Бүгінде бұл құбылыс лудомания деген атпен белгілі.
Осындай сын-қатерлер жағдайында Қызылорда қаласында ашылған балалар мен жасөспірімдерге арналған шығармашылық-инновациялық академиясы – жас ұрпақты лудомания секілді тәуелділіктерден сақтауға бағытталған батыл әрі нақты қадам.
Ашылу – салтанатты ғана емес, стратегиялық мәнге ие оқиға «Сыр жұлдыздары» деп аталған жаңа академияның ашылу рәсіміне ҚР Оқу-ағарту министрі Ғани Бейсембаев, Мәжіліс депутаттары Мұрат Әбенов, Мұрат Ергешбаев, Мархабат Жайымбетов, зиялы қауым мен қоғам белсенділері қатысты.
Облыс әкімі Нұрлыбек Нәлібаев салтанатты жиында жаңа білім ордасының жастар тәрбиесі мен ұлттық қауіпсіздік деңгейіндегі маңызын атап өтті:
«Жаңа нысандар – бұл жай ғана ғимараттар емес, олар – жаңа дәуірге бейім ұрпаққа арналған мүмкіндіктер алаңы. Егемен елімізді өркендетуде осындай кешендердің үлесі орасан» – деді аймақ басшысы.
Жаңа ұрпаққа – жаңа форматтағы мүмкіндік
Бұл академия – жай ғана шығармашылық үйірмелер орталығы емес. Бұл – балалардың уақытын мазмұнды, пайдалы әрі бәсекеге қабілетті етуге бағытталған кешенді платформа. Мұнда бір мезетте 500 бала, ал тәулігіне 3000 оқушы қабылданады.
Академия базасында:
• Робототехника, биотехнология, жасанды интеллект,
• 3D модельдеу, автоматтандыру, киберспорт,
• Сәндік-қолданбалы өнер, кескіндеме, дыбыс жазу студиясы,
• Спорттық және шығармашылық залдар
секілді заманауи бағыттағы 30-дан астам кабинеттер мен зертханалар жұмыс істейді.
Бұл – баланың компьютер алдында сағаттап онлайн ойын ойнап, бәс тігіп уақыт өткізуінің орнына, өз қолымен құндылық тудырып, шынайы жеңіс пен жетістікті сезінуіне жол ашады.
Лудоманиядан құтқару – шығармашылық арқылы
Лудомания – баланың психологиялық және әлеуметтік дамуына кері әсер ететін, көзге көрінбейтін қауіпті дерт.
Ол көбіне бос уақыттың көптігі мен мағынасыздығынан, қызығушылық ортасының болмауынан туындайды. Академия дәл осы пробеманы шешуге бағытталған.
Орталықта психологтар мен мотивациялық коучтар, цифрлық қауіпсіздік мамандары да жұмыс істейді. Балалардың психоэмоционалдық жағдайы тұрақты бақылауда болады.
Мемлекеттік саясатпен үндес бастама
Президент Қасым-Жомарт Тоқаевтың:
«Сапалы білім – жетістікке жетудің жолы әрі экономиканы дамытудың басты құралы»
деген сөзіне сай, бұл жоба тек жергілікті емес, ұлттық стратегиялық маңызы бар үлгі жобаға айналуда.
2022-2024 жылдары Қызылорда облысында білім саласына 304 млрд теңгеден астам қаржы бөлініп, бұл салаға бөлінетін бюджеттің 43%-ын құрады. Бұл – нақты нәтиже мен шынайы өзгерістерге жол ашып отыр.
«Сыр жұлдыздары» шығармашылық-инновациялық академиясы – бала болашағын қорғаудың, ұлттық сана мен интеллектіні ұштаудың, лудомания секілді тәуелділіктермен күресудің ең тиімді үлгісі.
Құмар ойынына емес, құндылыққа қызығатын ұрпақ тәрбиелеу – мемлекеттің де, қоғамның да ортақ парызы.
Ал мұндай орталықтар – сол парыздың орындалуына апарар берік баспалдақ.
