фото: әншінің Instagram-дағы парақшасынан
Дәстүрлі әнші Айгүл Елшібаева жақында «1001 түн» студиясында қонақта болып, өмірі мен өнер жолындағы күрделі сәттерімен бөлісті. Сұхбат барысында ол көзіне жас алып, анасына деген сағынышын айтып берді, деп хабарлайды Тodayinfo ақпараттық порталы.
Сұхбат барысында Айгүл Елшібаева дәстүрлі өнер саласында жүрген өнерпаздарға оңай еместігін тілге тиек етті.
«Қасқырға тән қайсар мінез болмаса, дәстүрлі өнермен эстрада әлемінде қатар жүріп, өз жолыңды табу қиын. Бірақ анамның қасында әрқашан сәби күйінде қаламын. Қазір анам 80-нен асты. Жас кезімізде өнердің соңында жүрдік. Нағыз көмек берер кезде анам қартайып қалды. Бұл жүрегіме ауыр тиеді», – деді ол көңілі босап.
Әнші анасымен қарым-қатынасы туралы ерекше сезімдерін де жасырмады.
«Анамды «ақ көкем» деп атаймын. Ол осы сөз арқылы мені таниды. Жанында болған сайын оны соңғы рет көріп тұрғандай күйге бөленемін», – деп толқыды Айгүл Елшібаева.
