Астанадағы танымал супермаркеттің тілге қатысты әрекеті қоғамда дау тудырды. Резонансқа қатысты пікірлер легі тоқтар емес. Осы оқиға аясында журналист Бибігүл Дәулетбекқызы оқу-ағарту министрі Ғани Бейсембаевқа үндеу жариялап, шенеуніктердің үнсіздігіне ашық наразылық білдірді, деп хабарлайды Todayinfo.
Тілді қорлаған мұғалім болып шыққан. Өз қармағындағы мектеп мұғалімінің елді дүрліктірген әрекетіне министр үнсіз қалған. Ол бұл оқиғаның жай ғана тұрмыстық жанжал емес, мемлекеттік деңгейдегі мәселе екенін алға тартады. Оның айтуынша, қазақ тілін талап еткені үшін жұмысынан айырылған қарапайым курьердің тағдыры мен оқушы тәрбиелеп отырған мұғалімнің әрекеті – министрлік назарынан тыс қалмауы тиіс.
«Ғани Бейсембаев, сіз өзі барсыз ба бұл әлемде? Шуды бастаған – мектепте сабақ беретін мұғалім. Аты-жөні – Асылхан Алимханович. Әлімханұлы емес – Алимханович», – деп жазады Бибігүл Дәулетбекқызы.
Журналисттің айтуынша, оқиға барысында курьер жай ғана «қазақша сөйлесеңіз жақсы болар еді» деп өтініш білдірген. Ал бұл сөз мұғалім тарапынан агрессия ретінде қабылданып, артынша дауға ұласқан.
«Жай ғана тілін қорғағысы келген ауыл қазағы жұмыстан қуылды. Жасы – 38-де. Көпбалалы әке. Жақында жұбайы босануы керек. Ал мұғалім TikTok-та күнде сурет салып отыр. Кешірім сұрау, өкініш – жоқ. Таңдау өзімде дейді», – деп ашынды журналист.
Мемлекеттік тілді қорлаған мұғалімге қатысты министр Бейсембаев әдеттегідей үнсіз қалған. Журналист бұл жағдайға министр Ғани Бейсембаевтың пікір білдірмеуін қатаң сынға алады.
«Асхат Аймағамбетов мұндай кезде үнсіз қалмайтын. Хэллоуин өткізілді десе, сол күні тоқтататын. Facebook парақшасынан халықпен кері байланыс орнататын. Ал қазіргі министрдің парақшасын ақтарсам – бәрі тамаша, өмір керемет. Атырауда көк туымызды қорлаған хиджабтағы оқушы қыз туралы да, Семейде таяқ жеген жетім бала жайлы да бір ауыз сөз жоқ», – дейді автор.
Журналист министрдің әлеуметтік желіде халықпен ашық байланыс орнатпағанын атап өтіп, оны «бұқарамен үзіліп қалған диалог» деп бағалайды.
Журналист «ана тілінде сөйлеуді сұраған азаматты жұмысынан айырған ұстаздан шәкірт не үйренеді?» дейді.
«Өз ана тілі үшін арандатушылық жасайтын мұғалімнен қандай ұрпақ өседі? Бұл сұраққа министрлік те, қоғам да жауап беруі керек», – деп Бибігүл Дәулетбекқызы.
Журналист министр Бейсембаевқа кеңесші болуға әзір екенін, егер қажет болса, әлеуметтік желідегі қатынас, коммуникация мен шешендік бағытында көмектесуге дайын екенін де кекесінмен жеткізді.
Әлеуметтік желілерде Magnum супермаркеттер желісінің курьерінің жұмыстан шығарылуы қоғамда үлкен талқыға түсті. Бұл жағдай курьердің клиенттен қазақ тілінде сөйлеуін сұрауынан кейін болған.
Клиент Асылхан есімді азаматтың айтуынша, ол Magnum-нан азық-түлікке тапсырыс берген кезде, курьер одан қазақша сөйлеуді талап еткен. Кейін бұл оқиға әлеуметтік желіде жарияланып, нәтижесінде курьер жұмыстан қуылған.
Бұл жағдай қоғамда үлкен наразылық тудырды. Көптеген қазақстандықтар Magnum желісіне бойкот жариялайтынын мәлімдеді. Әлеуметтік желі қолданушылары компанияның әрекетін сынға алып, мемлекеттік тілге деген құрметтің төмендігін атап өтті.
фото: Үкімет
