Сәкен Мұсайбеков Қазақстан хоккей федерациясының бас директоры болып бекітілді
Қазақстан хоккей федерациясының кезектен тыс республикалық конференциясының шешімімен Сәкен Жүнісбекұлы Мұсайбеков бас директор лауазымына тағайындалды. Федерацияның ресми мәлімдемесіне сәйкес, Мұсайбековтің спорт саласындағы мол тәжірибесі мен жоғары біліктілігі шайбалы хоккейдің дамуына ықпал етеді деп күтілуде.
Мұсайбеков бұған дейін мәдениет және спорт вице-министрі, Қазақстан Ұлттық Олимпиадалық комитетінің бас хатшысы сияқты лауазымды қызметтерді атқарған. Сонымен қатар, федерацияның халықаралық байланыстарын нығайту мақсатында Глеб Қаратаев вице-президент болып тағайындалды.
Федерация басшысы – Асқар Мамин
Айта кетейік, Қазақстан хоккей федерациясын бұрынғы премьер-министр Асқар Мамин басқарады. 2022 жылы Қаңтар оқиғасынан кейін қызметінен босатылғаннан бері Мамин хоккей федерациясындағы жұмысымен шектеліп келеді.
Мұсайбековтің өткен қателіктері
Сәкен Мұсайбековтің жаңа тағайындалуы қоғамда түрлі пікір туғызуда. Себебі ол 2021 жылы ірі көлемде алаяқтық жасады деп айыпталған болатын. Мұсайбеков букмекерлік компанияларға қолдау көрсету үшін пара алып, ол қаражаттың 4 миллион теңгесін әйеліне Hermes сөмкесін сатып алуға жұмсаған. Кейін экс-шенеунік кінәсін мойындап, мемлекетке 62 миллион теңге айыппұл төлеген.
