Білім саласында жұмыс істейтін басшылар былтыр мемлекеттен 7 миллиард теңгені ұрлаған, деп хабарлайды Todayinfo агенттігі.
Сыбайлас жемқорлыққа қарсы іс-қимыл агенттігінің Превенция қызметінің басшысы Саян Ахметжанов былтыр білім саласында жасалған жемқорлыққа тоқталды.
«2023 жылы білім саласында өңірдегі әкімшіліктермен, Оқу-ағарту министрлігімен бірлесіп сыртқы талдау жүргіздік. Талдау нәтижелері БАҚ арқылы жеткізілді. Соңғы жылдары мұғалімдерге, осы салада (білім – авт.) істейтін қызметкерлерге Президенттің Жолдауда берген тапсырмасына сәйкес бөлінген қаражаттың ұрлануына қатысты білім саласында істейтін есепшілердің қылмыстары анықталды», — деді Саян Ахметжанов.
Оның айтуынша, қазіргі таңда әр саланың ақпараттық жүйесі бір-бірімен интеграцияланбаған. Ахметжанов атағандай, қазір сараптама жұмыстары жүргізіліп жатыр. Ол Жетісу облысындағы фактіні мысалға келтірді.
«Сол себепті есепшінің өз шешімімен мұғалімге, тіпті сол мекемеде істемейтін азаматқа қаражат бөлінген. Оны анықтадық. Осындай мәселе бойынша 35 қылмыстық іс қозғалды. Қазір қылмыстық істер тергеліп жатыр. 2,5 жыл бойы қылмыстық желі жұмыс істеді. Оның құрамына білім бөлімінің басшысы мен екі бухгалтері, сондай-ақ 13 мектеп бухгалтері кірді. Барлық рөлі бөлінді. Бухгалтер жалақы қорынан бюджет қаражатын ұрлағанда қаланың білім бөлімі басшысы пара алып, көз жұмып отырды. Ұсталған кезде білім бөлімінің басшысынан 1 млрд теңге тәркіленді. Тергеу аясында мемлекетке 4,4 млрд теңге шығын келтірілгені расталды», — деп мәлімет берді Антикор басшысының орынбасары Мәжілісте.
Күдіктілердің 2,9 млрд теңге тұратын мүлкіне тыйым салынды. Спикердің айтуынша, мұндай қылмыстар басқа да өңірлерде анықталып жатыр. Әсіресе, Алматы мен Шымкент қалалары, Қызылорда, Ақтөбе және басқа да облыстарда осындай қылмыстық схемалар анықталған. Сыбайлас жемқорлыққа қарсы іс-қимыл агенттігі төрағасының бірінші орынбасары Саян Ахметжановтың айтуынша, 35 қылмыстық іс мемлекетке 7 млрд теңге сомасында залал келтірген.
