Президент Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында цифрландыру мен жасанды интеллектіні (ЖИ) дамытуды басымдыққа айналдыруды тапсырды, деп жазады Todayinfo.kz.
2021 жылдан бастап жүргізіліп келе жатқан ауқымды цифрлық трансформация аясында Қазақстан Республикасы министрліктерінде мемлекеттік басқару тиімділігін арттыруға, әкімшілік және сыбайлас жемқорлық кедергілерді азайтуға, сондай-ақ азаматтар мен бизнеске көрсетілетін қызметтердің сапасын жақсартуға бағытталған цифрлық шешімдер кешені енгізілді.
Бұл көлеңкелі экономикадан 28 млрд теңгеден астам қаражатты шығарып, 13 млрд теңгеден астам бюджет қаражатын үнемдеуге мүмкіндік берді. Енгізілген шешімдердің жалпы тиімділігі 51,3 млрд теңгені құрады. Мемлекеттік қызметтерді көрсету мерзімі 20 есеге қысқарды. Сыбайлас жемқорлық және әкімшілік кедергілер төмендеді.
Клиентке бағдарланған, ашықтық, тиімділік және барынша автоматтандыру қағидаттарына негізделген мемлекеттік басқарудың платформалық моделі енгізілуде. Қызмет көрсету процесінде азаматтың қатысуын барынша азайтатын проактивті қызмет көрсету механизмдері іске қосылды.
Цифрлық үкіметті қолдау орталығы құрылды, сондай-ақ Цифрлық үкімет офисімен бірлесіп бизнес-процестерді реинжинирингтеу тәжірибесі енгізілді. Бұл тиімді шешімдерді талдауға, қайта жобалауға және ауқымдауға мүмкіндік береді.
«Қазақстан цифрландыру бойынша әлемдегі 193 елдің ішінде 24-орында тұр. Ал онлайн қызметтер индексі бойынша топ он елге кіреді. Қазір мемлекеттік қызметтердің 92%-ын онлайн алуға болады», — деді цифрлық даму, инновация және аэроғарыш өнеркәсібі министрі Жаслан Мәдиев.
Негізгі жетістіктер:
-
2021 жылдан бері жүргізілген цифрлық трансформация нәтижесінде бюджеттен 13 млрд теңге үнемделді, көлеңкелі экономикадан 28 млрд теңге шығарылды.
-
Мемлекеттік қызмет көрсету мерзімі 20 есеге қысқарды, онлайн қызметтердің үлесі 92%-ға жетті.
-
Қазақстан цифрландыру бойынша әлемдегі 193 елдің ішінде 24-орында, ал онлайн қызметтер индексінде топ-10 елдің қатарына енді.
Цифрлық сервистер:
-
Медициналық анықтамалар, еңбекке жарамсыздық парақтары, балабақша мен мектепке қабылдау, ЖОО-ға түсу, телемедицина, әлеуметтік әмиян жобасы енгізілді.
-
Жол апатына қатысты еврохаттама және автоматтандырылған атқарушылық іс жүргізу іске қосылды.
IT саласы:
-
Қазақстанда 18 мыңнан астам IT компания жұмыс істейді, олардың табысы 1,2 трлн теңгеге жетті.
-
Astana Hub және өңірлік IT-хабтар халықаралық серіктестермен бірге қазақстандық стартаптарды әлемдік нарыққа шығаруда.
-
2026 жылға дейін $1 млрд IT-қызметтер экспортын қамтамасыз ету көзделген.
Жаңа бастамалар:
-
Tech Orda бағдарламасы арқылы 2025 жылға дейін 100 мың IT маманы дайындалады.
-
Қазақ тіліндегі ірі тілдік модель AlemLLM және суперкомпьютерлік кластер alem.cloud іске қосылды.
-
Мемлекеттік қызметшілерді ЖИ-мен жұмыс істеуге үйрететін AI Qyzmet бағдарламасы басталды.
-
Ұлттық мессенджер Aitu мемлекеттік цифрлық платформа мәртебесін алуда.
Цифрлық трансформация Қазақстанның экономикалық өсімінің және халықаралық беделінің басты драйверлерінің біріне айналып отыр.
