Қазақстанда медицина қызметкерлеріне күш көрсетіп, шабуыл жасағандар үшін жаза күшейтілмек. Бұл туралы Денсаулық сақтау министрі Ақмарал Әлназарова мәлімдеді. Жаңа заң жобасы 2024 жылдың қыркүйек айында Парламентке енгізіледі, деп хабарлайды Todayinfo.
«Мемлекет басшысы тиісті тапсырма берді. Кеше Премьер-Министрдің қатысуымен өткен кеңесте де нақты міндеттер жүктелді. Өзім де еңбек жолымды медбике және қабылдау бөлімінің дәрігері ретінде бастағанмын. Бұл — отыз жылдан астам уақыт бұрын болған жағдай. Сол кезде мұндай оқиғалар мүлдем тіркелмейтін. Ал бүгінде мұндай шабуылдар ай сайын тіркелуде. Бұл жағдайдың өте күрделі екенін көрсетеді», – деді министр.
Министрдің айтуынша, жаңа қылмыстық-құқықтық нормалар жобасы әзірленіп, қазіргі таңда Бас прокуратура және Ішкі істер министрлігімен бірлесіп пысықталып жатыр.
Жаңа бап – 158-1: Қылмыстық кодекске толықтыру енгізіледі
Ақмарал Әлназарованың мәліметінше, Қылмыстық кодекске медицина қызметкерлеріне қатысты арнайы 158-1-бап енгізілмек. Онда мынадай жазалар қарастырылады:
-
Егер медицина қызметкеріне күш қолданамын деп қорқытса – 2 жылға дейін бостандығын шектеу;
-
Егер нақты күш қолдану фактісі орын алса – 2 жылдан 7 жылға дейін бас бостандығынан айыру;
-
Егер шабуыл төтенше жағдай кезінде жасалса – 10 жылға дейін жаза қарастырылған;
-
Бірнеше адам тарапынан бір немесе бірнеше медицина қызметкеріне қарсы ұйымдасқан әрекет болса – 15 жылға дейін бас бостандығынан айыру көзделеді.
«Бұл – медицина қызметкерлерін қорғауға бағытталған орынды әрі әділетті шара. Заң жобасы қыркүйек айында Парламент қарауына енгізіледі», – деді министр.