Фото: Дәулет Мұқаевтың әлеуметтік желісі
Мәжіліс депутаты Дәулет Мұқаев жасанды интеллектті (ЖИ) оқушыларға қолдануға шектеу қою қажет деп санайды. Бұл туралы ол ЖИ-ді реттеу туралы заң жобасын талқылау кезінде айтты,деп хабарлайды Todayinfo агенттігі.
«Технологияның дамығаны жақсы, бірақ уақыт өте келе бұл миымыздың шектеуіне, ойланбауына алып келетін процесс секілді», – деді депутат.
Оқушылар ЖИ-ді тапсырмаларды орындау үшін пайдаланып, өз бетінше ойлануды доғарады деп алаңдаушылық білдірген Мұқаев мектеп жасындағы балаларға шектеу енгізу қажеттігін атап өтті.
«Мектеп жасындағы балаларға қандай да бір шектеу қойылуы керек. Егер шектеу болмаса, олар студент атанған соң, еңбек нарығына араласқан кезде оның зардабын 20 жылдан кейін көреміз. Бұл – елімізге келе жатқан үлкен қауіптердің бірі», – деп мәлімдеді ол.
Бұл ұсыныс қоғамда түрлі пікір тудырып, ЖИ-ді білім саласында қалай тиімді пайдалану керектігі жөнінде жаңа талқылауларға жол ашуы мүмкін.
