Шымкентте мәйіті қоқыстан табылған Диана Оңғарбаеваны жақындары ақтық сапарға шығарып салды. Тұңғышын жер қойнына тапсырған анасы көргенде өз перзентін танымай қалған, деп хабарлайды todayinfo.kz.
Шымкентте 26 жастағы Диана есімді келіншек үй тазалауға тапсырыс алып, жұмыстан қайтып оралмаған. Артынша оның азаппен өлтірілгені белгілі болды. Марқұмның анасы Қарлығаш Оңғарбаеваның айтуынша, қызының денесі ауыр хәлде табылған: «Құлағы, мұрны, көзінен құрттар кіріп-шығып жатты. Танымай қалдым. Соңғы рет жоғаларынан бір күн бұрын сөйлестім».
Жақындарының сөзінше, Диананы телеграм арқылы жұмысқа шақырған адам – жөндеу жұмыстарын жүргізіп жүрген, кәмелетке толмаған жасөспірім. Қазір ол қамауға алынып, «адам өлтіру» бабы бойынша тергеу жүріп жатыр.
Алайда, отбасы полицейлердің әрекетсіздігіне наразы. Айтуларынша, жоғалғаны туралы арыз берілгенімен, бір апта бойы іздеу басталмаған. «21-інен 28-іне дейін еш нәтиже болмады. Арыз жазылғанмен тіркелмеген. Біз өзіміз күдіктіні таптық», – дейді анасы.
Марқұмның туыстары бұл іске тағы бірнеше адамның қатысы бар деп есептейді. Себебі Диананың телефонын сатуға барғандар қатарында екі адам болған. Артында 2 және 4 жасар екі қызы мен күйеуі қалды. Ерлі-зайыпты күнкөріс үшін қалаға көшіп келген екен.
Фото: aikyn.kz
