Семейде күндіз үйінен шығып кетіп, сол күйі қайта оралмаған 7 жастағы бала таңға жуық орманнан аман табылды, деп хабарлайды Todayinfo агенттігі Абай облыстық полиция департаментінің баспасөз қызметіне сілтеме жасап.
Ішкі істер органдары операцияға қатысқан әрбір азаматқа алғыс білдіріп, барлық күштердің ұйымшылдығы мен ынтымақтастығы шешуші рөл атқарғанын атап өтті.
Балаға медициналық көмек көрсетілді. Қазіргі уақытта оның өмірі мен денсаулығына қауіп төніп тұрған жоқ.
«Полиция, құтқару қызметтері және бей-жай қарамаған тұрғындардың арқасында бала аман-есен табылды. Барлық қызметтердің үйлесімді әрекетінің арқасында іздеу сәтті аяқталды. Жоғалған баланы Затон полиция бөлімінің учаскелік инспекторы Бекен Асыл мен Дархан Жұмағалиев тапты. Оның табандылығы мен кәсібилігінің арқасында іздестіру жұмыстары сәтті аяқталды. Іздеуге атсалысқан әрбір азаматқа алғысымызды білдіреміз!» — делінген хабарламада.
Айта кетейік, 2018 жылы туған бала 21 маусымда кешкі сағат 18:15 шамасында Туристическая көшесіндегі үйінен шығып кеткен. Сол сәттен бастап оның қайда екені белгісіз болған.
Даму ерекшелігі бар (аутизм) баланы іздеуге 1000-нан астам адам жұмылдырылды. Абай облысы полиция департаментінің үндеуіне волонтерлер, қоғамдық бірлестіктер мен жергілікті тұрғындар белсенді түрде үн қосты. Іздеу жұмыстарына полиция қызметкерлерімен бірге арнайы мақсаттағы ЖҚАЖ бөлімшесінің жауынгерлері және Ұлттық ұланның әскери қызметшілері жұмылдырылған.
Орман алқаптары, ашық дала мен іргелес аумақтар мұқият тексерілуде. Баланың қозғалысы мүмкін барлық бағыттарға полицияның қос-қостан жасақтары жіберілді. Патрульдік полиция батальонының күштері күшейтіліп, қызметтік иттер тартылды.
Полиция қызметкерлері, төтенше жағдайлар қызметі және еріктілер бір сәтке де тыным таппай, баланы іздеуді түн бойы жалғастырды. Таңғы сағаттарда жұмыстар қайта күшейтілді.
