ҚР Парламенті Мәжілісінің депутаты, блогер Дәулет Мұқаев балалардың тұсауын кесуге жарнама жасап жүр. Ең жоғарғы Заң шығарушы органда елдің экономикасына пайдалы іспен айналысуы тиіс халық қалаулысының әрекеті сынға ұшырады, деп хабарлайды Todayinfo.
Журналист Диас Нұрақын депутаттың деңгейі жайлы жазып, оны әлеуметтік желіге жариялап жіберді.
«Д-деңгей. Мәжіліс депутаты Дәулет Мұқаев инста парақшасына “оптом” тұсау кесемін деп хабарландыру беріпті. Тіпті елу адам кезекке тұрып үлгерген. Енді келесі акция мамырдың ортасында болады деп оқырмандарына құлаққағыс қылыпты. Депутаттың деңгейін қараңыздар? Өзін қоғам қайраткері секілді сезініп жүр. Асанәлі Әшімов, Гена Головкин, Елдос Сметов сияқты танымал болса ше, шіркін?!», — деп сынады журналист.
Жалпы парламентте отырған біраз депутаттың деңгейіне күмәнмен қарайтындар аз емес. Өйткені, мандатқа ие болғанмен, біразының не заңнан, не экономикадан немесе саясаттан хабары жоқ. Қызыл тілмен көпіре сөйлейтін кейбір депутаттардың халық арасында мүлдем беделі жоқ.
«Дәулетке тұсау кестіру дым да авторитет емес қой. Мына бала тұсау кескені үшін гонорар сұраса да таңқалмаймын. Әлде әркімнің қалтасына қарай көсіліп жапқан шапанын, символический сыйлық деп ұсынған нан салғышын немесе ырымдап берген 5-10 теңгесін пайда ретінде көре ме? Депутат заң шығарады, елдің жайын ойлайды деп жүрсек, мынауың “тұсау кесем” деп атырауша айтқанда картопты жарды ғой. Өткенде іш-киімдерін қалай қаттайтынын көрсетіп “креативный”видео салып еді. Бір ісі-бір ісінен сорақы болып барады», — деп жазды Диас Нұрақын.
