АҚШ президенті Украина президенті Владимир Зеленскиймен кездесу қарсаңында резонансты мәлімдеме жасады деп хабарлайды Todayinfo.kz. Ақпаратқа сүйенсек, Ақ үй өкілдері бұл кездесуді осы аптада өткізуді жоспарлап отыр.
The Telegraph басылымының жазуынша, Трамп Украина билігі сирек кездесетін жер металдарын (редкоземельді металдар) АҚШ-қа беру туралы келісімге келіскені туралы мәлімдеген. Олардың жалпы құны 500 миллиард долларға бағаланады. Трамптың айтуынша, дәл осы келіссөздердің нәтижелеріне сай АҚШ-тың Украинаға Ресейдің әскери басқыншылығына қарсы көмек көрсетуді жалғастыру-жалғастырмауы шешілмек.
«Олар келісімге келуі мүмкін, келмеуі де мүмкін. Бір күні Ресейдің бір бөлігіне айналуы мүмкін, немесе айналмауы да мүмкін», – деді Дональд Трамп Fox News арнасына берген сұхбатында.
АҚШ президенті сонымен қатар Ресей-Украина қақтығысы мәселелері бойынша арнайы өкілі генерал Кит Келлоггтің жақын күндері Киевке сапарлайтынын растады. Бұдан бөлек, 14 ақпан күні АҚШ вице-президенті Джеймс Вэнс Мюнхендегі қауіпсіздік конференциясы аясында Владимир Зеленскиймен кездесуді жоспарлап отыр.
Өз кезегінде Зеленский Дональд Трамппен жеке кездесуге дайындық жүргізіп жатқанын мәлімдеді. 10 ақпанда ол Украинаға «нағыз бейбітшілік пен тиімді қауіпсіздік кепілдіктерін» қамтамасыз етуге шақырды.
Украинадағы сирек кездесетін жер металдарының қоры ақшалай баламада 12 триллион долларға дейін жетуі мүмкін. Бұған дейін Трамп АҚШ-тың Ресей-Украина қақтығысы басталғаннан кейін көрсеткен көмегіне өтем ретінде осы қорлардың бір бөлігін алғысы келетінін айтқан.
Ал Кремль Трамптың мәлімдемесіне жауап қайтарды. Ресей президентінің баспасөз хатшысы Дмитрий Песков «Украинаның едәуір бөлігі қазірдің өзінде Ресейдің құрамына өтті» деп мәлімдеді. Ол Ресей өзіне қосып алғанын жариялаған төрт украин аймағын (Донецк, Луганск, Запорожье және Херсон облыстарын) меңзеді. Десе де, бұл облыстарды Ресей әскері толық бақылауына алған жоқ. Сондай-ақ халықаралық қауымдастық та Ресейдің бұл өңірлерге құқығын мойындаған жоқ. Қазақстан да әлем елдерінің басым көпшілігі сияқты Украинаның аумақтық тұтастығын құрметтейді.
Дональд Трамптың Ресей-Украина соғысын тоқтату жоспары қақтығысты қазіргі жағдайда «тоқтатып қоюды» қарастырады, яғни Ресей басып алған жерлерін сол күйінде ұстап қалуы мүмкін. Бұл Украина жерінің шамамен 20 пайызына тең.
