ҚР Энергетика министрлігі Орынбор газ өңдеу зауытында болған төтенше жағдайға байланысты ресми түсініктеме берді, хабарлайды Todayinfo.
«Газпром» мәліметінше, 19 қазан күні ұшқышсыз ұшу аппаратының шабуылы салдарынан зауытта апатты жағдай тіркелген. Соның нәтижесінде кәсіпорын Қарашығанақ кен орнынан шикі газ қабылдауды уақытша тоқтатты.
Министрліктің хабарлауынша, зауыттың зақымдану сипаты мен оны қалпына келтіру мерзімі туралы ресейлік тарап әзірге ақпарат ұсынған жоқ.
Сонымен бірге Қазақстанның ішкі нарығы газбен толық қамтамасыз етіліп отыр.
«Газ тұтынушыларға қалыпты режимде, ешқандай шектеусіз жеткізілуде», – делінген ведомство хабарламасында.
Қарашығанақ шикізатын өңдеу мен мұнай өндіруге ықтимал әсер мәселелері кен пайдаланушыларымен бірлесіп қарастырылып жатыр. Шығындар мен алдағы шаралар туралы қосымша хабарланатын болады.
Энергетика министрлігі жағдайды бақылауда ұстап, ресейлік тарап және кен орны операторларымен тұрақты байланыста екенін атап өтті.
Фото: Орынбор газ өңдеу зауытының баспасөз қызметі
