Бүгін Мәжілістің жалпы отырысында «2014 жылғы 29 мамырдағы Еуразиялық экономикалық одақ туралы шартқа өзгерістер енгізу туралы хаттаманы ратификациялау туралы» Заңы қабылданды.
Хаттамаға 2023 жылғы 25 мамырда Мәскеу қаласында қол қойылған. Құжат техникалық реттеу, ветеринариялық-санитарлық әрі карантиндік фитосанитарлық шаралар, тұтынушылардың құқықтарын қорғау, тарифтік емес реттеу және мемлекеттік сатып алулар бөлігінде түзетулерді қамтиды.
«Еуразиялық экономикалық одақ туралы шартқа техникалық реттеу, санитарлық, ветеринарлық-санитарлық және карантиндік фитосанитарлық шаралар, тұтынушылардың құқығын қорғау, тарифтік емес реттеу, бәсекелестік, сондай-ақ мемлекеттік сатып алуға қатысты 32 түзету енгізіледі. Біріншіден, ЕАЭО елдерінің Еуразиялық экономикалық одақтың бірыңғай тізбесінде болмаған, яғни зиянды организмдерге қатысты шұғыл фитосанитарлық шаралар енгізіліп жатыр. Біздің елімізде бұрын анықталмаған зиянкес жаңа жәндіктерді тіркеу жағдайы орын алған. Мұндай жәндіктер Бірыңғай тізімде жоқ. Қазіргі кезде бірыңғай келісілген тізімдегі зиянкес жәндіктерге қатысты ғана уақытша карантиндік фитосанитарлық шаралар енгізіліп жатыр. Осы жағдайда, Хаттамада ЕАЭО елдерінің шұғыл фитосанитарлық шараларды енгізуі құқығы ескеріліп отыр», — деді ҚР Сауда және интеграция министрі Арман Шаққалиев.
Бұл ретте, мемлекеттер мұндай шараның енгізілгені туралы қалған елдерді алдын ала хабардар етуі тиіс. Осындай жағдайларда өзара хабарлау тәртібін Комиссия әзірлеп бекітеді.
«Екіншіден, Ұлттық электронды цифрлық қолтаңбаларды өзара тануды қамтамасыз ету жөніндегі қағидаларды бекітуге Комиссияның құзыреті енгізіледі. Қазір Еуразиялық экономикалық одақ туралы шартта мемлекеттік сатып алуға қатысу үшін ұлттық электрондық цифрлық қолтаңбаларды өзара тану көзделген. Ережелер уәкілетті органдардың өзара іс-қимыл жасау тәртібін айқындауға және электронды форматта өткізілетін мемлекеттік сатып алуға қатысуға қол жеткізуді қамтамасыз етуге мүмкіндік береді. Үшіншіден, Еуразиялық үкіметаралық кеңеске тұтынушылардың құқығын қорғау үшін мүше мемлекеттердің бірлескен іс-қимыл бағдарламасын бекіту құқығы беріледі. Сонымен қатар, тұтынушылардың құқығын қорғау функциялары ұлттық құзырет болып қала беретінін атап өткен жөн. Үкіметаралық кеңес тек жалпы тәсілдер мен ұсыныстарды бекітеді», — деді министр.
Мұнымен қоса ол тауарларды әкелу немесе әкету кезінде рұқсат құжаттарын алу процесі жеңілдейтінін айтты.
«Қазір лицензия беру ережелері Еуразиялық экономикалық одақ туралы шарт аясында ескерілген. Оларды түзету өте қиын. Ережені Еуразиялық экономикалық комиссия кеңесінің бекітуі ұсынылып отыр», — деді ведомство басшысы.
Жалпы, рұқсат құжаттарын электрондық форматта беру мүмкіндігі қарастырылып жатыр.
