10 мамыр 2025 жылы әйгілі «Шымбұлақ» тау курортында алғашқы экологиялық мәдениет фестивалі — EcoDay өтті. Бұл біркүндік шара қоршаған ортаға ұқыпты қарау идеясы, тұрақты өмір салты мен практикалық экобілімді ұштастырып, табиғатқа жанашыр қонақтарды біріктірді.
Бұл туралы Todayinfo ақпарат агенттігі хабарлайды.
Фестивальдің басты мақсаты — экология жайлы құрғақ теориядан гөрі, әр адамның қолынан келетін нақты әрекеттерді көрсету. EcoDay шарасы «Шымбұлақ» курорты, Recycle Birge экологиялық қозғалысы және Қазақстандағы алғашқы zero-waste дүкені HelloEco-ның ынтымақтастығымен ұйымдастырылды.
Экосананы іспен қалыптастыру
EcoDay бағдарламасы — экологиялық баламаларды іс жүзінде таныстыруға негізделген. Қонақтар түрлі шеберлік сабақтарына қатысты: қағаз бен пластикті қайта өңдеу, табиғи спрей жасау, пластиксіз күтім құралдарын дайындау сияқты пайдалы іс-шаралар өтті.
Фестиваль аумағында Leave No Trace принциптерімен танысатын аймақтар ұйымдастырылып, адамдарға табиғатқа зиян келтірмей демалудың жолдары көрсетілді. Сонымен қатар, ескі немесе қажетсіз заттарды жаңа өнімдерге айналдыратын апсайклинг бағытында да шеберлік сабақтары жүргізілді.
Күні бойы өтіп жатқан экологиялық ойындар арқылы қонақтар экосыйлықтар ұтып алып, өздерінің күнделікті әдеттеріне жаңаша көзқараспен қарауға мүмкіндік алды.
«EcoDay енді жыл сайын өтетін тұрақты шараға айналады. Бұл — курорттың тұрақты даму бағытының бір бөлігі. Президент ұсынған экологиялық күн тәртібіне біздің қосқан үлесіміз осы. Көптеген адамдардың шағын қадамдары үлкен өзгеріске әкеледі», — деді Shymbulak Outdoor басшысының орынбасары Махамбет Абдуллаев.
Әр адамға түсінікті, қолжетімді қадамдар
Қазақстандағы алғашқы zero-waste дүкен HelloEco-ның тең құрылтайшысы Дина Огай — фестивальдің ең жарқын өкілдерінің бірі. Ол үшін экологиялық бастамалар — жай ғана белсенділік емес, адамдарға табиғатпен үйлесімді өмір сүру мүмкіндігін қарапайым тілмен жеткізудің жолы:
«Экологиялық өмір салты — құрбандық емес. Бұл — бір реттік заттарды көп реттікпен алмастыру, таңдау кезінде саналы болу. Табиғатқа жанашырлық таныту үшін өмір салтын түбегейлі өзгерту шарт емес. Заманауи адам болып қала тұра, экологиялық зиян келтірмеуге болады. Ең бастысы — көпшілікті тарту, әр мүмкіндікті пайдаланып, олардың әрекеттері маңызды екенін жеткізу».
Экобілім — мәдениеттің іргетасы
EcoDay фестивалінің маңызды серіктесі — Recycle Birge экологиялық қозғалысы болды. Қозғалыстың тең құрылтайшысы, эколог Пакизат Сайлаубекова шараның басты миссиясы — халықтың экологиялық сауатын арттыру екенін атап өтті:
«Біз экологияны қиын әрі қол жетпейтін нәрсе деп емес, әркімнің күнделікті өмірінде қолдана алатын оңай да түсінікті әрекеттер ретінде көрсеткіміз келеді. Қайта өңдеу, бір реттік заттардан бас тарту, саналы тұтыну — мұның бәрі әр адамға қолжетімді. EcoDay аясында біз осыны көрсетіп, пайдалы тәжірибемен бөлістік. Шымбұлақтың бұл бастамасын толық қолдаймыз және алдағы уақытта да бірге жұмыс істеуге дайынбыз».
Сайлаубекова сондай-ақ табиғатқа барған әр адамның артында экологиялық із қалатынын ескертті:
«Гүлді жұлмау, қоқысты жинау — қарапайым әрі маңызды әрекеттер. Біз табиғатты жақсы көреміз, қаладан небәрі 20 минутта керемет табиғат аясында болуға мүмкіндік бар. Бірақ адам барған жерде экологиялық әсер қалады. EcoDay секілді шаралар адамдарға осыны жеңіл әрі түсінікті түрде жеткізеді».
EcoDay Шымбұлақта — экологияны насихаттаудағы жаңа деңгей. Бұл — жасыл болашаққа бағытталған нақты қадамдардың бірі. Мұндай іс-шаралар тек табиғатты қорғап қана қоймай, қоғамда экологиялық мәдениетті қалыптастыруда шешуші рөл атқарады. Алға жылжудың кілті — әр адамнан басталатын қарапайым, бірақ мағыналы әрекеттерде.
