Қарағанды облысында экологиялық жағдайды жақсарту және тұрғындардың өмір сапасын арттыру басты басымдықтардың бірі болып отыр, деп хабарлайды Todayinfo.kz ақпараттық агенттігі.
Мемлекет басшысының «Таза Қазақстан» бастамасы аясында өңірде ауқымды экологиялық акциялар ұйымдастырылды. Нәтижесінде 90 мың тоннадан астам тұрмыстық қалдық жиналып, 5 мың аула, 147 саябақжәне 700 әлеуметтік нысанның аумағы тазартылды. Сонымен қатар, 60 мыңнан астам ағаш отырғызылып, көгалдандыру жұмыстары тұрақты түрде жалғасуда.
Экологиялық инфрақұрылымды дамыту бағытында да нақты қадамдар жасалуда. Балқаш қаласында қатты тұрмыстық қалдықтар полигонының құрылысы толық аяқталды. Бұған қоса, Абай қаласында жаңа полигонның құрылысы жүріп жатыр, ал тағы төрт аудан бойынша жобалық-сметалық құжаттама әзірленуде.
Мұндай шаралар өңірдің экологиялық қауіпсіздігін күшейтіп, қалдықтарды басқарудың бірыңғай жүйесінқалыптастыруға мүмкіндік береді.
– «Мемлекет басшысы атап өткендей, “Таза Қазақстан” – бұл тек бір реттік акция емес, қоғамның өмір салтына айналуы тиіс ұлттық идея. Яғни, экологиялық жауапкершілікті күнделікті өмір дағдысына айналдыруымыз қажет. Қарағанды өңірі дәл осы бағытта жүйелі жұмыс жүргізуде», – деді облыс әкімі Ермағанбет Бөлекбаев.
