Белгілі қоғам және мемлекет қайраткері, Аңсар Тұрсынханұлы Мұсахановтың дүниеден озуына байланысты сенатор марқұмның отбасы мен жақындарына көңіл айтты, деп хабарлайды Todayinfo.
«Осындай ауыр күнде қаралы көңілдеріңізге жұбаныш, қайысқан қабырғаларыңызға медет тілеймін. Аңсар Тұрсынханұлы өз еңбек жолын ауылшаруашылығы саласынан бастап, ҚР Парламенті Сенатының экс-депутаты, ҚР Президенті Әкімшілігінің мемлекеттік инспекторы, Алматы облысының әкімі, Жамбыл және Қарасай аудандарының әкімі қызметтерін зор абыроймен атқарды. Ол елдің қоғамдық-саяси өмірінің бел ортасында жүріп, халықтың ризашылығына бөленген ардақты жан еді», – деп жазды сенатор.
Сонымен қатар, ол марқұмның адамгершілігі мен елге сіңірген еңбегін ерекше атап өтті.
«Өмірде болмысы бөлек, ұстанымы берік замандасымыздың айтар асыл ойлары мен халқына берер пайдасы мол еді. Адал еңбегімен, халыққа деген жанашырлығымен есте қалған азаматтың жарқын бейнесі әрдайым жадымызда сақталады», — деді ол.
Сөзінің соңында сенатор марқұмның отбасы мен жақындарына сабыр тілеп, жылы лебізін білдірді.
«Марқұмның жасаған жақсылықтары сауаптан жазылсын, жатқан жері жайлы, топырағы торқа болсын. Артында қалған ұрпақтарына және жақын туыс-бауырларына ұзақ өмір, амандық тілеймін. Жаратқан ұрпағына ұзақ ғұмыр нәсіп етсін. Асыл азаматтың иманы саламат болсын», — деді ол.
