Мемлекет басшысы Қасым-Жомарт Тоқаев көлік саласының қызметкерлерін марапаттады. Президент ең алдымен, көлік саласы қызметкерлерін кәсіби мерекесімен құттықтап, оларды еліміздің дамуына елеулі үлес қосып жатқан нағыз еңбек адамдары ретінде атады, деп хабарлайды Todayinfo ақпараттық агенттігі.
– Мемлекет үшін көлік саласының стратегиялық маңызы айрықша. Бұл – айқын нәрсе. Көлік жүйесі – әрбір елдің дамуының көрінісі. Онсыз экономиканың алға басуы мүмкін емес. Сондықтан бұл салаға біз аса маңызды басымдық ретінде қараймыз. Көлік құралдары – экономиканың қозғаушы күші, өсіп-өркендеу кепілі десек, артық болмайды. Еліміздің осы саладағы мүмкіндіктері мол, тіпті, бірегей деуге болады, – деді Қасым-Жомарт Тоқаев.
Салтанатты жиында еліміздің көлік саласын дамытуға, қатынас жолдарының инфрақұрылымын қалыптастыруға және жаңғыртуға қосқан елеулі үлесі үшін бір топ азамат мемлекеттік наградамен марапатталды. Оның қатарында Түркістан облысының темір жол саласында еңбек етіп, талай жыл тер төккен қос бірдей азамат та бар.
Атап айтар болсақ, «Қазақстан темір жолы» ҰК» АҚ «Шымкент магистральдық желі бөлімшесі» филиалы Арыс сигнализация және байланыс дистанциясының бөлімше бастығы Алмас Қонысов пен ҚТЖ, «Жүк тасымалы» ЖШС «ЖТ Шымкент бөлімшесі» филиалы Түркістан пайдалану локомотив депосының кезекшісі Жұмағали Қантәжиев «Ерен еңбегі үшін» медалін иеленді.
