Фото: ҚМА
“Бірыңғай жинақтаушы зейнетақы қорынан” 46 миллиард теңге жымқырғандардың бірі ұсталды. Бұл туралы Сенатта өткен брифинг барысында Қаржылық мониторинг агенттігі төрағасының орынбасары Жеңіс Елемесов мәлімдеді, деп хабарлайды Todayinfo.kz ақпарат агенттігі.
Оның айтуынша, жалған стоматологиялық клиникалар арқылы зейнетақы қорынан ірі көлемде қаржы ұрлау дерегі бойынша іс тергеліп жатыр.
«Үш күдіктінің біреуі ғана ұсталды. Ол мемлекеттік шекарадан өтпек болған кезде қолға түсті. Қалған екеуі, біздің деректер бойынша, ел аумағынан тыс жерге қашып кекткен. Қазір құқық қорғау органдары, Интерпол және көршілес елдердің қаржы барлау бөлімдерімен бірлескен іздестіру шаралары жүргізіліп жатыр», — деді Елемесов.
Еске сала кетейік, қыркүйек айында күдіктілер БЖЗҚ-дан 46 миллиард теңгеден астам қаржыны заңсыз шығару схемасын ұйымдастырғаны анықталған. Олар жалған медициналық құжаттар жасап, стоматологиялық қызмет көрсеткендей етіп рәсімдеген.
Бұл мақсатта Ақтау мен Атырауда жеті «жалған» клиника тіркелген, алайда олардың ешқайсысы шын мәнінде медициналық қызмет көрсетпеген. Бұған дейін Атырауда зейнетақы қорынан тіс емдеуге деп 200 миллиард теңге ұрлаған топ ұсталғаны туралы жазған едік.
