Фото: Видеодан алынған кадр
Қызылорда облысында Энергетика министрлігіне қарасты аумақтық департаменттің басшысы ұсталды, деп хабарлайды Todayinfo.kz ақпарат агенттігі.
2025 жылғы 23 шілдеде Ұлттық қауіпсіздік комитетінің Сыбайлас жемқорлыққа қарсы іс-қимыл қызметі ҚР Энергетика министрлігінің энергетикалық қадағалау және бақылау комитетінің Қызылорда облысы бойынша аумақтық департаментінің басшысын ұстады.
Ол жер қойнауын пайдаланушылардан жүйелі түрде материалдық пайда алуға мүмкіндік беретін сыбайлас жемқорлық схемасын ұйымдастырды деп күдіктелуде.
Аталған факті бойынша ҚР Қылмыстық кодексінің 362-бабы 4-бөлігінің 3-тармағы және 364-бабы 1-бөлігі бойынша сотқа дейінгі тергеп-тексеру амалдары жүргізілуде. Күдіктіге қатысты қамауға алу бұлтартпау шарасы қолданылды.
ҚР Қылмыстық-процестік кодексінің 201-бабына сәйкес тергеу мүддесіне байланысты басқа мәліметтер жарияланбайды.
