Фото: Ерке Есмахан instagram
Танымал әнші Ерке Есмахан өзіне арналған ерекше сыйлық жайлы әсерлі жазбасын әлеуметтік желіде бөлісті. Жолдасы Райм оған екі жылда екі рет босанғаны үшін сыйлықтар жаудырған. Әнші бұл сәттерді еске алып, жүрегін тербеген әсермен бөлісті, деп хабарлайды Todayinfo ақпараттық агенттігі.
«2 жылда 2 бала босану оңай емес. Оны түсінген күйеуім Батырға аяғым ауыр кезде көңілімді көтеру үшін барын салды. Өздеріңіз куәсіздер. Соңғы айларда қатты ауырсынып жүргенде сыйлықты жаудырды. Қырқынан шығару кезінде де сыйлық алып берді. Әлі ашпадым да, тақпадым. Баршаңызға байдың қатыны болуды тіледім», – деп жазды Ерке.
Алайда Ерке Есмахан үшін ең әсерлі сәт материалдық емес, рухани сыйлықпен байланысты болды. Жолдасы Райм оған арнайы ән арнағанын айтқан кезде әнші толқып, көзіне жас алғанын жасырмады.
«Жақында күйеуімнің барлық сыйлығын ысырып қоя салдым. Өйткені, жолдасым маған баға жетпес сыйлық дайындады. Менің сахнаны сағынғанымды сезіп, өнер адамы екенім туралы әңгіме бастады. Сөйтіп, студияға мені отырғызып, өзінің маған арнап, ән шығарғанын айтты. Тыңдап, еңкілдеп, бір жылап алдым. Ең үлкен сый осы болды. Жақын арада сіздер де тыңдайсыздар. Райм, мен сені сүйемін», – деп жазды әнші.
Жазба астында пікір қалдырған желі қолданушылары Ерке мен Раймның арасындағы шын махаббатты, бір-біріне деген құрмет пен қолдауды ерекше атап өтті. Жанкүйерлер жас отбасына бақыт тілеп, әннің жарық көруін асыға күтетінін жазуда.