Белгілі продюсер Гүлзира Айдарбекова тойларда ән салу үшін қанша гонорар алатынын айтып, өтемақы төлемейтіндерге ренішін білдірді,деп хабарлайды Todayinfo ақпараттық агенттігі.
Продюсер туыстар мен жақындардың шақыруынан бас тартуға болмайтынын, кейде өтемақы төлемей, тегін өнер көрсетуге тура келетінін жасырмады.
«Ағайын-туыс көп болған соң, тегін баруға тура келеді. Бірақ еңбекақыңды дұрыс бермесе, барғың да келмейді. Біреудің жақсылығы үшін немесе өзің біреуді қуантқың келгенде ғана тегін өнерімізді көрсетеміз,» – деді ол «Taboo» бағдарламасына берген сұхбатында.
Продюсердің айтуынша, өзі мен жары Нұрекеңнің тойдағы жол шығыны 1,5 миллион теңгені құрайды.
«Нұрекең қазір Астанада, мен Алматыдамын. Екеуміздің жолымыз бен қонақүйіміз бар. Соның бәрін есептегенде – 1 миллион 500 мың теңге. Той өте көп. Ырымын жасап, арнайы жолыңды берсін деп шақыратындар да бар,» – деді ол.
Гүлзира Айдарбекова әншілікке қалай келгенін де айтып өтті.
«Маған көп адам хабарласады. “Қызымды ұзатып бер”, “Баламды бесікке салып бер” деп өтінеді. Бір күні маған “Ән жоқ па?” деген сұрақтар қойыла бастады. Сөйтіп алғаш рет «Зуби-зуби» әнін жаздырдық. Ол халыққа қатты ұнады. Одан кейін тағы әндер жазып, тойларда айта бастадым,» – дейді продюсер.
Дегенмен, ол өзін профессионалды әнші санамайтынын және тек тойларда ғана ән салатынын атап өтті.
«Продюсер – әншіден биік. Өз атымды төмендеткім келмейді,» – деді Гүлзира Үсенқызы.
