Астана қаласында Перизат Қайрат пен оның анасы Ғайни Алашбаеваға қатысты алаяқтық фактісі бойынша қозғалған қылмыстық іс бойынша сот отырысы өтіп жатыр. Қазіргі таңда іс жарыссөз кезеңіне жетіп, жәбірленуші тараптар өз пікірлерін білдіріп жатыр,деп хабарлайды Todayinfo.
Сот процесінде алғашқы болып сөз алған жәбірленуші – компания өкілі Исаева – бұл істің тек жеке деңгейде емес, қоғам назарын аудартқанын баса айтты.
«Бұл процеске екі апта бойы бүкіл ел назар аударып отыр. Тек қатысушылар ғана емес, істің БАҚ пен әлеуметтік желілерде кеңінен жариялануы арқылы бүкіл қоғам бақылап отыр», – деді Исаева.
Оның айтуынша, айыпталушылардың әрекеттері қоғамда үлкен резонанс тудырып, медиада оларды әйгілі алаяқтармен салыстырып жатыр.
«Анасы мен қызының әрекетін медиада белдемше киген Остап Бендермен, әйгілі алаяқ Софья Блювштейнмен салыстырып жатыр. Адам өз ісі үшін жауап беруі керек, сезінуі керек», — деді жәбірленуші.
Исаеваның сөзінше, олар бұл қаржыны 2024 жылғы су тасқынынан зардап шеккен халыққа көмек көрсету мақсатында аударған. Алайда сенім ақталмай, алаяқтық дерегі бойынша сотқа жүгінуге мәжбүр болғанын айтты.
«Біз 2024 жылы су тасқынынан зардап шеккен халыққа көмектескіміз келді. Сізден ең қатаң жаза тағайындауыңызды сұраймын», — деді жәбірленуші Исаева судьяға.
Компания Перизат Қайрат басшылық еткен қорға 200 миллион теңге көлемінде қаражат аударғанын ресми мәлімдеді. Қазіргі таңда аталған сомаға азаматтық талап қойылып отыр.
