Мемлекет басшысы Қасым-Жомарт Тоқаев өз Жолдауында кәсібилік пен еңбекқорлықты қоғамдағы ең жоғары құндылық ретінде атаған еді. Еліне жаны ашитын әр азамат өз саласының жауапкершілігін терең сезініп, ісін сапалы орындаған кезде ғана мемлекет дамып, көркейе түседі. Бұл қағида күнделікті өмірде қарапайым еңбек адамдарында айқын көрінеді. Todayinfo ақпараттық агенттігінің тілшісі жаздың аптап ыстығына, қыстың қақаған аязына қарамастан тұрғындарға үздіксіз су жеткізіп, қала инфрақұрылымның тұрақты жұмысын қамтамасыз етіп жүрген мамандармен сұхбаттасты.
Дмитрий Литвинов осы салада 30 жылдан астам уақыт бойы еңбек етіп келеді.
«Мектеп бітірген соң газоэлектрлік дәнекерлеуші мамандығы бойынша техникумға түстім. Ата-анам мен бауырым су жүйесінде жұмыс істейтіндіктен, мен де сол жерден еңбек жолымды бастадым. Жұмыс ұнады, училищені тәмамдадым. Он жеті жасымнан бері осы саладамын», — дейді ол.
Маман кез келген қызмет әуелі елге пайда әкелуі керегін айтады.
«Біз вентильдерді ауыстырамыз, су құбырларын жөндеп, жер қазып апаттарды жоямыз. Мұнда дұрыс техникалық шешім қабылдау өте маңызды, сондай-ақ әріптестермен сыйластық та басты рөл атқарады. Мен жұмысыма тек табыс көзі ретінде қарамаймын. Адамдарға пайдалы болғаныма қуанамын. Жастарға кеңесім, қарапайым еңбектен қорықпасын. Қандай мамандық болса да, адал еңбекпен келген нанның тәтті екенін білсе деймін», — дейді Дмитрий.
Дмитрий Литвинов 1993 жылдан бері Жетісу аудандық пайдалану учаскесінде 5 разрядты слесарь ретінде қызмет атқарып келеді. Ол өз жұмысында жауапкершілігімен, тәртібімен және бастамашылдығымен ерекшеленген қадірлі маман.
Дмитрий Литвиновтың әріптесі Дүнесбай Аханаев та 1997 жылдан бері қала су жүйесінде еңбек етеді. Оның басты міндеті — кез келген авариялық жағдайды жедел шешіп отыру.
«Біздің ұжымда бірнеше бригада бар, әрқайсысында он адам шамасында жұмыс істейді. Жұмыс жеңіл емес, қажет болса түнде де шығып жөндейміз. Бірақ ең бастысы — кәсібіңді сүйіп, оны адал атқарсаң, жемісін де көресің. Осы қызметім қалаға, халыққа пайдасын тигізіп жатыр деп ойлаймын», — дейді маман.
Дүнесбай Аханаев ұжымдағы достық пен сыйластықты да ерекше атап өтті.
«Кейде кикілжіңдер болады, бірақ ұжымның бірлігі мықты. Біз бір-бірімізге қолдау көрсетеміз, тәжірибемізді бөлісеміз», — дейді ол.
Дүнесбай Аханаев қазіргі кезде Түрксіб аудандық пайдалану учаскесінің бригадирі болып жұмыс істейді. Ол жас мамандарға өз тәжірибесін бөлісуден ешқашан аянған емес. Үнемі төтенше жағдайларда жылдам әрі дұрыс шешім қабылдай алатын, ұыжымында беделі артқан маман.
Айта кетейік, екі маман да су саласындағы көп жылғы адал еңбегі мен кәсіби шеберлігі үшін«Ерен еңбегі үшін» медалімен марапатталған болатын.
Фото: depositphotos.com
