Алматы облыстық сотының хабарлауынша, Іле аудандық соты экс-әкім Бағдат Қарасаев пен өзге де айыпталушыларға қатысты қылмыстық істі қарауды аяқтады.
Сот деректері бойынша, Қарасаев қызметтік өкілетін асыра пайдаланып, бір компанияға жер телімін заңсыз берген, қоқыс полигонын басқаруда кәсіпорынның мүддесін қорғаған және тыйым салынған кәсіпкерлікпен айналысқан.
Үкімге сәйкес:
— Қарасаев 3 жыл 3 айға бас бостандығынан айырылды, мемлекеттік қызметте жұмыс істеуіне өмір бойы тыйым салынды;
— Б. бір жылға бостандығы шектелді және мемлекеттік қызметке өмір бойы жіберілмейді;
— Д.-ға 2 жыл 6 ай бостандығын шектеу жазасы тағайындалды, мемлекеттік мүлікке қатысты сенімгерлік басқару саласында 3 жыл жұмыс істей алмайды;
— М. толық ақталды.
Үкім заңды күшіне әлі енген жоқ.
Қарасаев 2018 жылдан бері Іле ауданын басқарған. 2024 жылдың қыркүйегінде Антикор оны қоқыс полигонын сенімгерлік басқару құқығын заңсыз беру және мерзімін рұқсатсыз ұзарту бойынша коррупция күдігімен ұстаған. Тексеру барысында санитарлық және өрт қауіпсіздігі талаптарының бұзылғаны анықталған.
Тергеу мәліметінше, бұл схемаға аудандық қаржы және ТКШ бөлімдерінің басшылары да қатысқан болуы мүмкін.
Фото: instagram
