Әзербайжан президенті Ильхам Әлиев Ақтауда апатқа ұшыраған AZAL әуе компаниясына тиесілі ұшақ оқиғасына байланысты Ресейге қарсы халықаралық сот органдарына шағым әзірленіп жатқанын мәлімдеді, деп хабарлайды Todayinfo Minval басылымына сілтеме жасап.
«Бәрі айдан анық»
Президенттің айтуынша, бұл оқиғаның мән-жайы “айдан анық”, алайда Ресей тарапынан жеті ай ішінде бірде-бір нақты жауап берілмеген.
«Әзербайжан Бас прокуроры Ресей Тергеу комитетінің басшысына бірнеше рет ресми сұрау жолдағанымен, тек “тергеу жалғасып жатыр” деген жалпылама жауап келеді», – деді Әлиев.
Халықаралық сотқа дайындық
Ильхам Әлиевтің айтуынша, Әзербайжан билігі ресми досье дайындап, бұл іске халықаралық деңгейде әділет іздемек.
«Біз Ресей жағына бұл туралы ескертіп қойдық. Малайзиялық Boeing-тің апатына байланысты тергеу он жылдан аса уақытқа созылған еді . Біз де сол сияқты он жыл күтуге дайынбыз, бірақ әділет орнауы тиіс», – деп мәлімдеді Әзербайжан президенті.
Ресеймен қарым-қатынасқа әсері
Президент Әлиев қазіргі жағдайда істің “ауада тұрғаны” Әзербайжан мен Ресей арасындағы екжақты қатынастардың дамуына кедергі келтіріп отырғанын да атап өтті.
Сондай-ақ, Әзербайжан тарапы:
• Кінәні ресми түрде мойындауды,
• Ұшақты атып түсіргендерге жаза қолдануды,
• Қаза тапқандардың отбасыларына өтемақы төлеуді,
• AZAL әуе компаниясына келтірілген шығынның орнын толтыруды талап етуде.
Сұрақ көп, жауап аз
Әлиевтің айтуынша, Әзербайжан тарапы оқиға туралы нақты не болғанын біледі, әрі ресейлік ресми тұлғалар да хабардар.
«Мәселе – неге көрші ел ретінде олар тиісті қадамдар жасамай отыр? Кез келген көрші мемлекет мұндай жағдайда жауапкершілік танытар еді», – деді мемлекет басшысы.
Фото: Sean Gallup / Getty Images
