Астана қаласының әкімшілік құқық бұзушылықтар жөніндегі мамандандырылған ауданаралық соты әлеуметтік желіде жалған ақпарат таратқаны үшін Б.-ға 707 760 теңге айыппұл салды. Бұл шешім Әкімшілік құқық бұзушылық туралы кодекстің 73-3-бабының 2-бөлігі бойынша қабылданды, деп хабарлайды Тodayinfo ақпараттық порталы.
Оқиға қалай өрбіді?
Құқық бұзушы әлеуметтік желіде зәулім үйдің видеосын жариялап, оны халықтың қайырымдылыққа берген қаражаттарына салынған үй деп көрсеткен. Сондай-ақ ол бұл үйдің Астана қаласының бас имамына тиесілі екенін мәлімдеп, жалған ақпарат таратқан.
Сотта құқық бұзушы өз кінәсін мойындады. Ол бейнероликті тек «көру үшін жариялағанын» айтып, үйдің нақты иесі мен оның қандай қаражатқа салынғанын білмейтінін түсіндіріп, өкініш білдірді.
Сот үкімі
Сот құқық бұзушының кінәсін толық мойындауын және өкінуін жеңілдететін мән-жай ретінде ескерді. Ауырлататын мән-жайлар анықталған жоқ.
ӘҚБтК-нің 73-3-бабының 2-бөлігіне сәйкес, сот Б.-ны кінәлі деп тауып, 180 АЕК (707 760 теңге) мөлшерінде айыппұл салды.
Қаулы әлі заңды күшіне енген жоқ.
Үйдің нақты иесі кім?
Бұл оқиға әлеуметтік желілерде кеңінен тараған болатын. Астана қаласының бас имамы Ерболат Жүсіпов бұл ақпаратты жоққа шығарып, зәулім үйдің өзіне қатысы жоқ екенін мәлімдеді.
Кейін үйдің иесі анықталып, ол Нұрлан Леспекұлы есімді азамат екенін айтты. Ол «Зекет» қорының басшысы болып шықты және үйдің өзіне тиесілі екенін растады.
