Фото: informburo.kz
Соңғы күндері әлеуметтік желілер мен кейбір БАҚ беттерінде «Алматы ипподромының орнына тұрғын үй салынады» деген ақпарат кең тараған болатын. Алайда бұл мәліметтер шындыққа жанаспайды, деп хабарлайды Todayinfo.kz ақпарат агенттігі.
«Tengri Invest» ЖШС ресми түсініктеме беріп, тарихи нысанның аумағында ешқандай құрылыс жұмыстарының жүріп жатпағанын мәлімдеді.
— «Ипподромда құрылыс басталған жоқ. Тұрғын үй де, коммерциялық нысандар да салынбайды. Бұл жер бұрынғыдай ат спорты жарыстары мен ұлттық спорт түрлерін дамыту орталығы болып қала береді», — деді компания директоры Ержан Майлыбаев.
Алматы қаласы әкімдігі де бұл ақпаратты жоққа шығарып, алаңның мәртебесі өзгермегенін растады.
— «Қаланың егжей-тегжейлі жоспарлау жобасына сәйкес, ипподром аумағы дәл осы мақсатта бекітілген. Оны бұзу немесе қайта салу туралы ешқандай рұқсат берілген жоқ», — деп хабарлады әкімдік өкілдері.
Алматы ипподромы – тек спорт нысаны емес, ұлттық мәдениеттің бір бөлігі. Мұнда жыл сайын ат спортының түрлі жарыстары, ұлттық ойындар мен мәдени іс-шаралар өткізіліп келеді.
Яғни, Алматының тарихи ипподромы өз орнында қалады. Қала билігі мен «Tengri Invest» компаниясы тұрғындарды дүрліктірген қауесетті ресми түрде жоққа шығарды.
