Қазақстан Республикасының Президенті Қасым-Жомарт Тоқаевтың шақыруымен 2025 жылғы 26-27 сәуір күндері Италия Премьер-министрі Джорджа Мелони елімізге ресми сапармен келеді,деп хабарлайды Todayinfo ақпарат агенттігі.
Бұл сапар екі мемлекет арасындағы стратегиялық серіктестікті тереңдетуге бағытталған маңызды қадам болмақ.
Сапар аясында 27 сәуір күні Астана қаласында «Орталық Азия – Италия» форматындағы тұңғыш саммит өтеді. Бұл халықаралық деңгейдегі маңызды шараға Орталық Азия мемлекеттерінің басшылары мен делегациялары қатысады деп күтілуде. Саммит аясында өңірлік және жаһандық қауіпсіздік, экономикалық ынтымақтастық пен көлік-логистика саласындағы өзара іс-қимыл мәселелері талқыланады.
Кездесу барысында тараптар энергетика, инвестиция, көлік және «жасыл» технологиялар салаларындағы серіктестікті дамыту жолдарын талқылайды. Сонымен қатар, мәдени-гуманитарлық байланыстарды нығайту және білім беру саласындағы ынтымақтастықты кеңейту мәселелері де күн тәртібінде болады.
Италия – Қазақстанның Еуропадағы негізгі сауда серіктестерінің бірі. Екі ел арасындағы дипломатиялық қатынастар 1992 жылдан бері белсенді дамып келеді. Осы сапар барысында жасалатын келісімдер мен бірлескен мәлімдемелер тараптардың сенімді әріптестігін одан әрі тереңдетуге ықпал етеді.
