Түлкібас ауданында әлемдік бернд атауымен сусын ышғаратын жаңа зауыт іске қосылмақ, деп хабарлайды Todayinfo ақпараттық агенттігі.
Әлемнің сүйікті алкогольсіз сусыны Түркістан облысында да шығарылады. Түлкібас ауданындағы RC Сola атауымен алуан түрлі ауыз су және хош иісі бар сусындар шығаратын «Beibarys Bottlers» ЖШС-і биыл іске қосылады деп жоспарлануда. Жаңа зауыт заманауи өндірісте қолданылатын көп сатылы су тазарту жүйесі судың мінсіз сапасына кепілдік береді. Су зауыт аумағында орналасқан тереңдігі 170 метр ұңғымалардан алынады. Итальяндық технологиямен тазартылады. Су сапасына АҚШ және Италияның атақты зертханаларының сапа қорытындысы берілген.
«Жаңа жобаның жалпы құны – 7 миллиард 600 миллион теңге. Зауыт соңғы үлгідегі неміс технологиясымен жабдықталуда. ЖШС-інде 100-ге жуық жаңа жұмыс орны ашылады деп күтілуде»,- деп хабарлады Түркістан облысы әкімінің баспасөз қызметі.
Ауданға іссапармен барған Түркістан облысының әкімі Дархан Сатыбалды зауыт басшылығымен және жауапты сала жетекшілерімен кездесіп, өндірістік инженерлік инфрақұрылыммен қамту бойынша
жұмыс барысын талқылады. Жұмыстарды ширатуды тапсырды.
Әкімдіктің мәлімдеуінше, Дархан Сатыбалды өңірді көгілдір отынмен толық қамтуды да тапсырды. Атап айтқанда, электр желісі және газ құбыры 2021 – 2025 жылдарға арналған кәсіпкерлікті дамыту жөніндегі ұлттық жобасы аясында жүзеге асуда. Сонымен қатар кәріз жүйесі мен оны тазарту қондырғысының жобасы іске асып жатыр.
