АҚШ президенті Дональд Трамп өзінің мақсатына жеткен соң, айнып шыға келді. Ол Иран мен Израиль арасында атысты толық тоқтату жөнінде келісімге «қол жеткізілгенін» мәлімдеді. Шындығында Израиль әу бастан-ақ бұл соғысты екі аптаға жоспарлаған еді. Алайда соғысты тоқтатуды Трамп өзінің жеке басына пайдаланып әлек, деп хабарлайды Todayinfo ақпарат порталы.
Бұған дейін Трамп Тегеран халқын түгел эвакуациялауды айтқан еді. Үрей тастап, сан түрлі сес көрсеткен АҚШ президенті аяқ астынан айнып, соғыстың тоқтауына өзінің үлесі зор екенін мақтанышпен мәлімдеді.
— Барлығын құттықтаймын! Израиль мен Иран арасында атысты толық тоқтату жөнінде келісім жасалды. Келісім шамамен алты сағаттан кейін, тараптар қазіргі операцияларын аяқтаған соң күшіне енеді. 12 сағат ішінде атыс толық тоқтайды, ал 24 сағаттан кейін бұл соғыстың ресми түрде аяқталуы ретінде жарияланады, — деп жазды Трамп.
22 маусымға қараған түні АҚШ Иранның үш ядролық нысанына әуе шабуылын жасағанын хабарлаған еді. Негізгі соққы Фордо уран байыту зауытына бағытталды, сонымен қатар Исфахан мен Натанзедегі ядролық қондырғыларға Tomahawk қанатты зымырандары арқылы соққы берілді. Трамп бұл операциялардың нәтижесінде Иранның уранды байытуға арналған негізгі инфрақұрылымы «толығымен жойылды» деп мәлімдеді. Алайда Иран тарапы Фордоға тек ішінара зақым келгенін хабарлады.
Иран қарулы күштері Катар мен Ирактағы АҚШ әскери базаларына жауап ретінде бірнеше зымыран атқаны белгілі болды. Осы оқиғалардан кейін Катар Сыртқы істер министрлігі Иранның әскери әрекетін айыптады, ал Катардағы АҚШ базаларынан алдын ала эвакуация жүргізілгені туралы да хабарланды.
Атысты тоқтату жөніндегі келісім тараптардың одан әрі жағдайды ушығусыз шешуге дайын екенін көрсетеді. Халықаралық қауымдастық қазіргі уақытта жағдайды тұрақтандыруға бағытталған әрекеттерді қолдап отыр.
Ал Иран көсемі Аятолла Хаменеи қарымта қайтарып соғысуға шамасы жоқ, әрі биліктен айырылып қалудан қорыққан соң шығына ұшыраса да амалсыз келісімге келуге мәжбүр. Оның солақай саясатының кесірінен Иран экономикасы қирап, мыңдаған адам опат болды.
Ал АҚШ пен Израиль өз мақсаттарына толықтай жетті. Бұдан әрі мұнайдың қымбаттап, халық наразылығы күйшейіп кетуден сескенген соң бірден соғысты тоқтататын болды.
Таяу Шығыстағы қылмыстық ұйымдарды қаржыландырып отырған шииттік бағыттағы Иран шындығында қорғаныс күшінің әлсіз екенін көрсетті. Халқына да, мемлекетіне де қорған бола алмады.
Иран билігі бұған дейін соғыс енді басталды, ешқандай келісім болмайды деп мәлімдеген еді. Бункерге тығылған Аятолла өз басына төнген қауіптен сескеніп, батыстың талабын орындауға мәжбүр.
Израиль өз кезегінде Таяу Шығыста өзі қожа екенін тағы бір рет дәлелдеп, Иранға ондаған жыл бас көтере алмайтындай соққы беріп тастады.
