Түркістан облысының Қазығұрт ауданында 12 мыңнан астам кәсіпкерлік субьектісі бар. Өңірде кәсіп ашып, бизнеспен айналысам деген жандарға мемлекет әрқашанда қолдау көрсетеді, әрі заңдық тұрғыдан тұрақты кеңестер береді, деп хабарлайды Todayinfo ақпараттық агенттігінің тілшісі.
Түркістан облысы кәсіпкерлер палатасының Өңірлік кеңес төрағасы Нұралы Әбішов Қазығұрт және Төлеби аудандарының кәсіпкерлерімен кездесіп, бизнес өкілдерінің қорғалатынын және оларға жағдай жасалатынын жеткізді.
Басқосуға ҚР Сыбайлас жемқорлыққа қарсы іс-қимыл агенттігінің Түркістан облысы бойынша департаменті басшысының бірінші орынбасары Нұрлан Арынбаев, Өңірлік кеңес мүшелері, облыстық кәсіпкерлер палатасының директоры Асылан Ибадуллаев және жеке кәсіпкерлер қатысты.
Қос аудандағы кәсіпкерлердің өзекті мәселесі талқыланған көшпелі кеңес отырысында облыстық кәсіпкерлер палатасы Төлеби аудандық филиалының директоры Маржан Мусаева және Қазығұрт аудандық филиалының директоры Сержан Мамытбеков атқарылған жұмыс барысы туралы баяндама жасады. Шараның негізгі бөлігінде сұрақ-жауап кезеңіне кезек беріліп, кәсіпкерлердің көкейіндегі сұрақтарға сала мамандары жауап берді.
«Ел Президенті Қасым-Жомарт Тоқаев отандық бизнес өкілдерімен кездесуінде мемлекет тарапынан кәсіпкерлік саланы дамытуға баса мән беріліп отырғандығын атап өтті. Кәсіпкерлік – еліміздің экономикасын дамытудың негізгі бағыттарының бірі. Сондықтан өңір аумағында да кәсіпкерлерді қолдау шаралары өз деңгейінде жүргіледі. Облыстық «Атамекен» кәсіпкерлер палатасының жұмысы көңіл қуантарлық, дегенмен жұмысты тағы ширата түсу керек. Яғни кәсіпкерлерге бизнесін жандадыру мәселесінде бағыт-бағдар беру мен құқығын қорғау аясындағы жұмыстар жалғасын таба бермек», – деді Түркістан облысы кәсіпкерлер палатасының Өңірлік кеңес төрағасы Нұралы Әлмаханұлы.
Қазығұрт ауданының әкімі Азизхан Исмаиловтың айтуынша, ауданда 12058 кәсіпкерлік субъектісі тіркелген. Бизнес өкілдеріне жағдай жасау бойынша жоспарлы жұмыстар атқарылып келеді. Атап айтқанда жыл басынан бері өңірге 1 млрд 550 млн теңге инвестиция тартылған. Облыс басшысы кәсіпкерлерге қолдау көрсету жағын үнемі басты назарда ұстап келеді.
«Төлеби ауданындағы алқалы жиыннан соң өңірлік кеңес төрағасы бастаған топ «ФудМастер-Шымкент» ЖШС жұмысымен танысты. Көксәйек ауылдық округінде орналасқан кәсіпорын тәулігіне 70-80 тонна сүтті қайта өндеп, 60 тонна дайын өнім шығарады. Өндіріс орнында сүт, айран, қаймақ, биоайран, йогурт БиоС имун+ өнімдері өндіріледі», — деп хабарлады Түркістан облысы әкімінің баспасөз қызметі.
