Түркияның Мерсин провинциясындағы «Аккую» атом электр стансасының (Ресейдің «Росатом» корпорациясының стратегиялық жобасы) құрылыс алаңында жұмысшылар жаппай ереуіл жариялады. Олар стансаға баратын жолдарды жауып, жалақыларын толық төлеуді талап етіп, алаңға кіруге тырысқан көліктерге тас пен темір арматура лақтырып жатыр.
Интернетте таралған видеода полиция мен арнайы күштер су атқыштарды қолданып, ереуілшілерді қуып жатқан көріністер байқалады.
Журналист Михаил Козачковтың деректеріне қарағанда, ереуілшілердің арасында шамамен 200 қазақстандық жұмысшы бар. Құрылысшылардың айтуынша, оларға 2025 жылғы мамырдан бері жалақы төленбеген, сондықтан персонал саны 12 мыңнан 3 мыңга дейін қысқарған.
Материалда «Росатом» кадрларды тікелей жалдамайтыны, Ресейде қызметкерлерді «Титан-2» компаниясы жинап, ал Түркияда еңбек келісімдері TSM Enerji фирмасымен жасалатыны айтылған.
Бұған дейін Ресей «Аккую» жобасының 49 пайыздық үлесін 25 миллиард доллар бағамен сату үшін түрік және шетелдік инвесторлармен келіссөздер жүргізіп жатқаны және «Росатом»ның Қазақстандағы алғашқы атом электр стансасын салу консорциумының басқаруы туралы хабарланған.
