Ақтөбе облысының Темір ауданы Кеңқияқ ауылында Мұнай-газ кешені қызметкерлері күніне арналған мерекелік шара өтті, деп хабарлайды Todayinfo ақпараттық агенттігі.
Салтанатты концертке аудан әкімі Алмас Жақсылықов қатысып, сала ардагерлерін және еңбек озаттарын құттықтады. Әкім еңбек адамдарын алғыс хаттармен марапаттап, мұнайшылар қауымына деген ізгі тілегін жеткізді.
«Мемлекет басшысы биылғы жылды «Жұмысшы мамандықтар жылы» деп жариялады. Бұл – еңбек адамдарына деген құрметтің айқын көрінісі. Кеңқияқ кен орнында өткен ғасырдың 60-жылдарынан бастап қара алтын игеріле бастады. Бұл бүкіл еліміздің мұнай-газ өнеркәсібінің өркендеуіне тың серпін берген тарихи кезең болды. Бүгінгі таңда Кеңқияқ пен Саркөл өңірінде мұнайшылардың тұтас әулеттері қалыптасты. Осы айтулы күні барша мұнайшыға және сала ардагерлеріне алғысымды білдіремін», – деді аудан басшысы.
Мерекелік шара аясында гала-концерт ұйымдастырылып, эстрада жұлдыздары өнер көрсетті. Сонымен қатар, «Мерейлі отбасы» ұлттық конкурсының аудандық және облыстық кезеңдерінің жеңімпазы, мұнайшылар әулеті саналатын Рахметжановтар отбасы арнайы марапатталды.
Бұл күн – мұнайшылар еңбегіне көрсетілген ерекше құрметтің жарқын көрінісіне айналды.
