Түркістан облысы Кентау қаласына қарасты Қарнақ ауылындағы Дөдеген учаскесінде орналасқан «Зебо» шаруа қожалығы ерекше бастамамен көзге түсіп отыр, деп хабарлайды Todayinfo ақпараттық агенттігі.
Шаруа қожалығы шөлді жерлерде бақша өнімдерін өсірудің бірегей әдісін қолданып, алғашқы тәжірибені табысты жүзеге асыра бастады.
Биыл мамыр айының ортасында «Зебо» шаруа қожалығы 7 гектар аумақты алып жатқан тәлім жерге қауын отырғызды. Аталған аумаққа ағын су бармайтынына қарамастан, қожалықтың егіндері алғашқы өнімдерін бере бастаған.
Қожалық иелері мен мамандарының айтуынша, өнімдердің дәмі ерекше болып келеді. Оған басты себеп – бақша өнімдерін өсіруде тек табиғи әдістер қолданылады. Яғни, қауын-қарбызды өсіруде ешқандай химиялық тыңайтқыштар қолданылмайды және қарапайым су да пайдаланылмайды. Бұл әдіс қауынның табиғи дәмін сақтауға мүмкіндік береді, және де экологиялық таза өнім алу мүмкіндігі артады.
Жоспар бойынша, «Зебо» шаруа қожалығы қара күзге дейін 7 гектар алқаптан 30 тоннаға дейін өнім алуды көздеп отыр. Бұл ерекше әдістің нәтижесінде алынған өнімдер нарықта жоғары сұранысқа ие болатынына сенім мол.
Кентау қаласының Кәсіпкерлік және ауылшаруашылық бөлімі бұл бастаманы жоғары бағалап, басқа шаруашылықтарға да үлгі ретінде ұсынуда.
«Шөлді аймақтарда ауыл шаруашылығын дамытуға деген қызығушылықты арттыра отырып бұл жоба осы бағытта тың идеялар мен жаңа әдістердің пайда болуына ықпал етуі мүмкін,-дейді сала мамандары.
Ауылдағы «Зебо» шаруа қожалығының шөлде бақша өнімдерін өсіруі – елді мекен үшін айтарлықтай жаңалыққа айналған. Тұрғындар бұл бастаманы қалай қабылдағанын және олардың жобадан не күтетіні туралы пікірімен бөлісті.
Есенғали Сейітұлы, ауыл тұрғыны: «Мен бұл жобаның табысты болатынына сенімдімін. «Зебо» шаруа қожалығы өз тәжірибесі арқылы осы қиындықты еңсеруге болатынын дәлелдеп отыр. Олардың қауын өсіруде қолданатын әдісі табиғи әрі экологиялық таза екені көңіл қуантады. Ауылдастарымыз да бұл өнімдердің сапасы мен дәмін жоғары бағалап отыр».
«Менің ойымша, бұл жоба ауылымызға үлкен пайдасын тигізеді. Біріншіден, бұл жаңа жұмыс орындарының ашылуына септігін тигізеді, ал екіншіден, біздің жергілікті өнімдерді қалалар мен көршілес ауылдарға сатуға мүмкіндік береді. Қауынның дәмі ерекше, табиғи екенін білу – біз үшін үлкен мақтаныш», — дейді Гүлзада есімді ауыл тұрғыны.
